
विराटनगर । कोशी प्रदेशका ट्राफिक प्रहरी प्रमुख एसपी विनोद घिमिरेले मंगलबार जिल्ला ट्राफिक प्रहरी कार्यालय मोरङको निरीक्षण गरेका छन् ।
निरीक्षणका क्रममा कार्यालयको अवस्था र कामकारबाहीका बारेमा जानकारी लिँदै घिमिरेले ट्राफिक प्रहरीलाई आवश्यक निर्देशनसमेत दिएका छन् । उनले कुनै लोभलालच, दबाब र प्रभावमा नपरिकन कानुनले दिएको अधिकार प्रयोग गरेर काम गर्न ट्राफिक प्रहरीलाई निर्देशन दिए ।
ट्राफिक नियमको उल्लंघन रोक्नुपर्ने र दुर्घटना न्यूनीकरणमा विशेष ध्यान दिनुपर्नेमा एसपी घिमिरेको जोड छ । ‘ट्राफिक प्रहरीले आफ्नो जिम्मेवारी अनुसार काम गर्नुपर्छ । नियम उल्लंघन गर्ने सवारीलाई कारबाहीको दायरामा ल्याउनुपर्छ । नियमको पालना गराउन सचेतनामूलक कार्यक्रमहरुलाई व्यापक बनाउनुपर्छ,’ निर्देशन दिँदै उनले भने, ‘ट्राफिक प्रहरीले जहिल्यै पनि आफू जनताको सेवक हुँ भन्ने बुझ्नुपर्छ । आचरणविपरीतका काम गर्न हुँदैन । दायित्वलाई भुल्न हुँदैन ।’
एसपी घिमिरेले आचरणविपरीत काम गर्ने ट्राफिकलाई तत्काल कारबाहीको दायरामा ल्याउने चेतावनी पनि दिएका छन् । ट्राफिक प्रहरीको अभियान बढ्दो दुर्घटना न्यूनीकरणतर्फ केन्द्रित हुनुपर्ने उनले बताए ।
निरीक्षणका क्रममा मोरङ ट्राफिक प्रमुख इन्स्पेक्टर राजन लम्सालले जिल्ला ट्राफिकको कामकारबाही र भावी योजनाका बारेमा जानकारी गराएका थिए । उनले नियमको उल्लंघन रोक्न, दुर्घटना न्यूनीकरण गर्न र कानुन उल्लंघन गर्ने सवारीसाधनलाई कारबाहीको दायरामा ल्याउन ट्राफिक सक्रियता बढाइएको बताए ।

























