
काठमाडौं । प्रधानमन्त्री केपी शर्मा ओलीको चीन भ्रमण अघि चीन पुगेर परराष्ट्रमन्त्री डाक्टर आरजु राणा देउवा नेपाल फर्किएकी छन् ।
चिनियाँ विदेशमन्त्री वाङ यीको निमन्त्रणामा चीन पुगेर फर्किएकी राणाले बीआरआई परियोजनाबाट नेपालले ऋण लिन नसक्ने बताएकी छन् ।
त्रिभुवन अन्तर्राष्ट्रिय विमानस्थलमा आयोजित कार्यक्रममा उनले चिनियाँ परियोजना, बेल्ट एण्ड रोड इनिसिएटिभ (बीआरआई) को ऋण लिन सक्ने नेपालको अवस्था नरहेको बताएकी हुन् । उनले बीआरआई कार्यान्वयन दुवै देशको सहमतिमा अघि बढ्ने बताइन् ।
‘बीआरआई परियोजनाको फ्रेमवर्कमा नेपालले सन् २०१७ मा नै हस्ताक्षर गरिसकेको छ र अहिले यसको कार्यान्वयनको योजनाबारे कुराकानी भइरहेको छ,’ उनले भनिन् ,‘यो नेपाल र चीनबीचको सहमति समझदारीका साथै नेपालमा पनि सबैको साझा सहमतिकै आधारमा हुनेछ ।’
नेपाल ऋण लिन सक्ने अवस्थामा नरहेकाले चीन सरकारसँग पनि यसै विषयमा कुराकानी भएको स्पष्ट गरिन् । चिनिया समकक्षीसँग दुई देशबीचको बहुआयामिक सम्बन्धलाई अझ प्रगाढ बनाउने विषयमा छलफल भएको बताए ।

























