आर्मी र माउन्टेन मुभर्सलाई खुला बास्केटबलको उपाधि

Share this
701shares
मुलुकी खबर
मुलुकी खबर
clock२०८१ फागुन ११, आइतबार १९:५७

काठमाडौं । नेपाल आर्मी र माउन्टेन मुभर्सले खुला बास्केटबल प्रतियोगिताको उपाधि जितेका छन् । आर्मी पुरुष तथा मुभर्स महिलामा च्याम्पियन बने । दुवै अपराजित रहँदै उपाधि जित्न सफल भएका हुन् ।

नेपाल लोकतान्त्रिक खेलकुद संघ र नखिपोट युथ क्लबद्वारा संयुक्त आयोजित प्रतियोगिताको पुरुषको फाइनलमा आर्मीले प्ले बक्सलाई १११–७१ को फराकिलो अन्तरले पराजित गर्यो ।

आर्मीका निश्चल महर्जनले २८ अंक जोडे । फाइनलको स्कोर प्रतियोगिताकै सर्वाधिक स्कोर हो ।

पहिलो क्वाटरमा ३३–१८ को अग्रता लिएको आर्मीले अन्तिमसम्म त्यसलाई कायम राख्यो । आर्मीले दोस्रोमा २९–२०, तेस्रोमा २७–२२ र चौथोमा २२–११ को प्रदर्शन गर्यो ।

उपाधिसँगै आर्मीले १ लाख तथा प्ले बक्सले ५० हजार नगद पुरस्कार हात पारे ।

नखिपोटस्थित आयोजक क्लबको कभर्डहलमा भएको महिलाको उपाधि भिडन्तमा मुभर्सले कीर्तिपुरलाई ६२–५० ले हरायो । मुभर्सकी सम्झना शाहले १५ स्कोर गरिन् ।

राउन्ड रोविन लिमा पनि कीर्तिपुर मुभर्ससँग चुकेको थियो । मुभर्सले पहिलो क्वाटरमा २०–१४, दोस्रोमा १८–१० र तेस्रोमा १८–१३ को अग्रता लिनु नै जितको मुख्य आधार बन्यो ।

चौथो क्वाटर कीर्तिपुरले १३–६ को आफ्नो पक्षमा पारे पनि जितका लागि पर्याप्त भएन । विजेता मुभर्सले ५० हजार तथा उपविजेता कीर्तिपुरले २५ हजार नगद पुरस्कार पाए ।

प्रतियोगिताको पुरुषमा आर्मीका विनोद महर्जन तथा महिलामा भुमर्सकी छिरिङ छोकी शेर्पा ‘मोस्ट भेलुएबल प्लेयर’ घोषित भए । विनोदले २० हजार तथा छिरिङले १५ हजार नगद पुरस्कारसहित गिफ्ट ह्याम्पर प्राप्त गरे ।

पुरुषमा आयोजक नखिपोटका सर्जोक पुन मगर तथा महिलामा आईएसए नेपालकी मिली लामा तामाङ उदीयमान खेलाडी चुनिए । दुवैलाई जनही ५ हजार नगद पुरस्कारसहित गिफ्ट ह्याम्पर प्रदान गरियो ।

विजेतालाई नेपाल कांग्रेसका केन्द्रीय सदस्य मदनबहादुर अमात्य, ललितपुर जिल्ला खेलकुद विकास समितिका अध्यक्ष विनोद महर्जन, आयोजक नेपाल लोकतान्त्रिक खेलकुद संघ, ललितपुरका अध्यक्ष एवं नखिपोट युथ क्लबका महासचिव पुनीत गुरुङलगायतले पुरस्कृत गरे ।

५ दिने प्रतियोगिताको पुरुषमा १५ टिमले नकआउट तथा महिलामा ३ टिमले राउन्ड रोविन लिगका आधारमा प्रतिस्पर्धा गरेका थिए ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.