
विराटनगर । धनुषाको लक्ष्मीनिया गाउँपालिका–बनिनियामा श्रीमतीको हत्या गरी फरार भएका पुरुष पक्राउ परेका छन् । प्रहरीले स्थानीय हरिराम यादवलाई पक्राउ गरेको हो ।
गत फागुन १७ गते २० वर्षीया अञ्जली यादवको शव घरकै पूजा कोठामा गाडिएको अवस्थामा फेला परेको थियो । शव भेटिएको केही दिनअघि नै श्रीमान रामहरि १० महिने छोरीलाई लिएर बेपत्ता भएका थिए ।
घटनाअघि श्रीमान् श्रीमतीबीच विवाद भएको पाइएको प्रहरीले अनुसन्धानका क्रममा पत्ता लगाएको थियो । रामहरि पक्राउ परेपनि छोरी कहाँ कुन अवस्थामा छिन् भन्ने खुलेको छैन । घटनाको अनुसन्धान र बालिकाको खोजी जारी रहेको धनुषाका एसपी नरहरी रेग्मीले जानकारी दिए ।

























