मोरङ पूर्ण खोप सुनिश्चितता जिल्ला 

विराटनगर । मोरङलाई पूर्ण खोप सुनिश्चितता जिल्ला घोषणा गरिएको छ ।

स्वास्थ्य कार्यालय मोरङले विराटनगरमा सोमबार कार्यक्रमको आयोजना गरी मोरङलाई पूर्ण खोप सुनिश्चितता जिल्ला घोषणा गरेको हो ।

मोरङमा १ सय ५९ वटा वडामा आर्थिक वर्ष २०८१ / ०८२ मा जन्मेदेखि १५ महिनाभित्रका १६ हजार ५ सय ५१ जना बच्चा र १६ देखि ५९ महिनासम्मका ४४ हजार ३४ जना गरी कूल ६० हजार ५ सय ८५ जना बच्चालाई खोप दिलाइ पूर्ण खोप सुनिश्चितता जिल्ला घोषणा भएको हो ।

कार्यक्रममा बोल्दै जिल्ला समन्वय समिति मोरङका प्रमुख अजम्बर राईले पूर्ण खोप सुनिश्चितताका लागि निरन्तर अभियानमा लाग्न आग्रह गरे ।

त्यस अवसरमा जिल्ला खोप समन्वय समिति मोरङका सदस्यसचिव तथा स्वास्थ्य कार्यालय मोरङका प्रमुख सागर प्रसाईँ, प्रमुख जिल्ला अधिकारी इन्द्रदेव यादवले पूर्ण खोप सुनिश्चितता तथा दिगोपना निर्देशिका बमोजिम आवश्यक मापदण्ड पूरा गरी गरेको भन्दै आगामी दिनमा निरन्तरता दिनुपर्ने बताए ।