भोटखोलामा नागरिक आरोग्य सेवा केन्द्र

संखुवासभा । संखुवासभाको दुर्गम उत्तरी क्षेत्र भोटखालामा नागरिक आरोग्य सेवा केन्द्र स्थापना गरिएको छ ।

जिल्लामा आयुर्वेद स्वास्थ्यको पहुँच विस्तार गर्ने योजना तथा नसर्ने रोगको नियन्त्रण रोकथामका लागि भोटखोला गाउँपालिकामा नागरिक आरोग्य सेवा केन्द्र स्थापना गरिएको हो । भोटखोला –४ गोला बजारमा केन्द्र स्थापना गरिएको छ ।

नसर्ने रोगको नियन्त्रण, रोकथाम तथा उपचारात्मक सेवा प्रदान गर्नेदेखि स्वस्थ जीवनशैलीका बारेमा जनचेतना अभिवृद्धि गर्ने लक्ष्यका साथ केन्द्रको स्थापना गरिएको जिल्ला आयुर्वेद कार्यालय संखुवासभाका प्रमुख अनिलकुमार यादवले बताए । आयुर्वेद पद्धतिमार्फत उपचार सेवा दिने उद्देश्यले सञ्चालन भएको उक्त केन्द्रबाट सर्ने र नसर्ने रोगको रोकथाम तथा निदानलगायत बारेमा सेवा प्रवाह गरिने उनको भनाइ छ ।

केन्द्रबाट उपचारात्मक सेवा, निरोगी रहन स्वस्थ जीवन कार्यक्रम, औषधि वितरण लगायतका सेवा उपलब्ध गराइने छ । जिल्लाका १० पालिकामध्ये ५ पालिकामा नागरिक आरोग्य सेवा केन्द्र स्थापना भइसकेको छ ।

आयुर्वेद औषधालय नभएका ठाउँमा सरकारको लक्ष्य अनुसार गाउँमा सेवा विस्तार गर्न थालिएको हो । नागरिक आरोग्य केन्द्रले नसर्ने रोगको नियन्त्रण रोकथाम तथा उपचारात्मक सेवा प्रदान गर्नेदेखि स्वस्थ जीवनशैलीका बारेमा जनचेतना अभिवृद्धि गर्नुका साथै रोग नियन्त्रणजस्ता सेवा प्रवाह गर्नेछ ।

केन्द्रको स्थापनासँगै आयुर्वेद उपचार पद्धतिमा नागरिकको पहुँच वृद्धि हुने अपेक्षा गरिएको छ भोटखोला गाउँपालिका अध्यक्ष वाङछेदर भोटेले बताए । सेवा केन्द्रको उद्घाटन जिल्ला समन्य समितिका प्रमुख सुमन शाक्यले गरेका हुन् ।