
काठमाडौं । नेपाल टेनिस संघको अध्यक्षमा मनोहरदास मुल निर्विरोध निर्वाचित भएका छन् ।
शनिबार काठमाडौंमा भएको ११ औं विशेष साधारण सभाले मुलको अध्यक्षतामा १७ सदस्यीय केन्द्रीय कार्य समिति निर्विरोध चयन गरेको हो । नयाँ निर्वाचित समितिको कार्यकाल ४ वर्षका लागि हुने जनाएको छ ।
नवनिर्वाचित अध्यक्ष मुल यसअघि नेपाल टेनिस संघ तदर्थ समितिका संयोजक थिए । संयोजक अघि मुल महासचिवको जिम्मेवारीमा थिए ।
समितिको उपाध्यक्षमा दिनेश तुलाधर, विनोद कायस्थ र राजु श्रेष्ठ चयन भए । महासचिवमा निरेशबहादुर श्रेष्ठ, सचिवमा अजय विष्ट र कोषाध्यक्षमा जयजीव हाडा रहेका छन् ।
सदस्यमा प्रीति बराल, गोपालप्रसाद ज्ञवाली, अशोक गुरुङ, प्रवीण वैद्य, रविन प्रधान, गोकुल श्रेष्ठ, कवीन्द्र पन्त, निशान्तकुमार लामिछाने र सुन्दरबहादुर केसी चयन भए ।
नवनिर्वाचित पदाधिकारीलाई राष्ट्रिय खेलकुद परिषद् (राखेप) का कार्यकारी समितिका सदस्य कमलबहादुर भट्टराईले शुभकामना दिए भने राखेपअन्तर्गत खेलकुद विकास विभागका प्रमुख एवं प्रमुख निर्वाचन अधिकृत सरोजकुमार पोखरेलले प्रमाणपत्र प्रदान गरे ।

























