
विराटनगर । नेपाली राष्ट्रिय क्रिकेट टोलीका सदस्य ललित राजवंशीलाई मातृशोक परेको छ ।
विराटनगर महानगरपालिका–१४ जतुवास्थित आफ्नै घरमा राजवंशीकी आमा शुभकुमारी राजवंशीको निधन भएको जिल्ला क्रिकेट संघ मोरङका अध्यक्ष मोहम्मद साद बाबु कुरैसीले जानकारी दिए । ६० वर्षीया राजवंशी लामो समयदेखि फोक्सोको समस्याबाट पीडित थिइन् ।
उपचार सेवाकै कारण हालसम्म उनी दैनिकीमा भने सक्रिय रहँदै आएकी थिइन् । छिमेकी राजकुमार विश्वासका अनुसार राजवंशीको सिंघिया खोलामा विधिपूर्वक अन्त्येष्टि गरिने छ । आमाको निधन भएको खबरसँगै ललित पनि घर आइसकेका छन् ।
विश्वासले भने, ‘शनिबार राति घरमा खाना र औषधि खाएर सुत्नु भएको रहेछ । भोलिपल्ट बिहान छोरीले उठाउन जाँदा मात्र घटना थाहा भएको हो ।’

























