
काठमाडौं । ‘होप फर अल’ले काठमाडौंमा खुला फुटसल प्रतियोगिता आयोजना गर्ने भएको छ । ‘होप फर अल’ युवाहरूलाई सकारात्मक क्रियाकलापमा लाग्न सचेतनामुलक कार्यक्रम र अभियान सञ्चालन गर्दै आएको संस्था हो ।
लागुऔषध दुरुपयोग तथा मद्यपानको हानिकारक असरबारे सचेतना जगाउने उद्देश्यले काठमाडौं र बाहिरका प्रतिभाशाली युवा खेलाडीहरूको सहभागितामा भदौ २० गते फुटसल आयोजनाको तयारी गरिएको संस्थाका उपाध्यक्ष मुकेश कार्कीले जानकारी दिए ।
फुटसल खेल संयोजकसमेत रहेका कार्कीका अनुसार खेल ब्रदर्स फुटसल मुलपानी, काठमाडौंमा हुनेछ । नकआउटका आधारमा खोलाइने उक्त खेलमा जुनसुकै स्थानका कलेज, खेल क्लब र समुदायका युवाले टिम दर्ता गर्न पाउनेछन् ।
खेलको विजेता टिमले १ लाख नगद पुरस्कार पाउनेछ भने उपविजेताले ३० हजार पाउने आयोजकले जनाएको छ । विशेष पुरस्कारका साथै उत्कृष्ट खेलाडी, उत्कृष्ट गोलकर्ता र उत्कृष्ट गोलरक्षकलाई पनि सम्मान गरिनेछ ।
कार्कीका अनुसार ‘होप फर अल’ (सबैको लागि आशा) गैर–नाफामूलक संस्था हो । यसले लागुऔषध र मदिरापानको बढ्दो चुनौतीसामु स्वस्थ्य र सशक्त समाज निर्माणको लागि काम गर्दै आएको उनले बताए ।
युवा र समाज सुधारका विभिन्न कार्यक्रमहरू विद्यालय, कलेज र समाजसम्म पुर्याउन सचेतना अभियान, अन्तरक्रियात्मक कार्यशाला र सिप विकास गतिविधिहरूमा यो संस्था सक्रिय रहेको जानकारी कार्कीले दिए । यसपटक भने खेलकुदको माध्यमबाट युवा र खेलाडीमाझ पुग्न फुटसलको आयोजना गरिएको उपाध्यक्ष तथा फुटसल खेलका कार्यक्रम संयोजक कार्की बताउँछन् ।

























