
विराटनगर । मोरङ उद्योग व्यापार संघले नेपाल राष्ट्र बैंकका गभर्नर प्रा.डा. विश्वनाथ पौडेललाई निजी क्षेत्रको हकहित र प्रवर्द्धनका लागि आवश्यक नीतिगत तथा व्यवस्थापकीय कदमहरूका सम्बन्धमा सुझावपत्र बुझाएको छ ।
संघका अध्यक्ष अनुपम राठीको नेतृत्वमा वरिष्ठ उपाध्यक्ष अनिलकुमार साह, वाणिज्य उपाध्यक्ष अनिल सारडासहितको उद्योगी –व्यवसायी टोलीले विराटनगरस्थित राष्ट्र बैंकको प्रादेशिक कार्यालयमा आयोजित अन्तरक्रिया कार्यक्रममा सहभागी गभर्नर पौडेललाई सुझावपत्र हस्तान्तरण गरेका हुन् ।
अध्यक्ष राठीले निरन्तर २ वर्ष घाटामा देखिएका उद्योग / व्यवसायका ऋण र ब्याजदरमा सहजता प्रदान गर्न, ‘बुक लस’ भन्दा ‘क्यास लस’ लाई मान्यता दिन, डेब्ट –इक्वीटी अनुपात मिलेका प्रतिष्ठानको ऋणलाई खराब कर्जामा वर्गीकरण नगर्न आग्रह गरेका छन् ।
साथै, उद्योग / व्यवसायको कारोबार र प्रवृत्तिका आधारमा ६० प्रतिशतसम्म चालु पुँजी कर्जा सहज रूपमा उपलब्ध गराउनुपर्ने, निर्यातकर्ताका लागि आर्जन गर्ने विदेशी मुद्राको विनिमय दरमा ३ देखि ५ प्रतिशत थप रकम उपलब्ध गराउनुपर्ने, उद्योग / व्यवसाय क्षेत्रलाई बैंकिङ कारोबार गर्न बाधा नपर्ने गरी बैँकहरूको वार्षिक बिदा अधिकतम १३ दिन कायम गर्नुपर्ने लगायतका सुझाव प्रस्तुत गरे ।
सुझावपत्र ग्रहण गर्दै गभर्नर पौडेलले प्रस्तुत विषयहरू सकारात्मक र समयसापेक्ष रहेको उल्लेख गर्दै गृहकार्य गरी यथासम्भव सम्बोधन गर्ने प्रतिबद्धता जनाए ।

























