
काठमाडौं । जेनजी आन्दोलनपछि पहिलोपटक खुलेको सेयर बजारमा बिहीबार लगातार ३ पटकसम्म नकारात्मक सर्किट लागेपछि अर्थमन्त्री रामेश्वर खनाल ‘एक्सन’मा उत्रिएका छन् ।
कारोबार सुरु भएको केही समयमै नेप्से परिसूचकमा तीव्र गिरावट आएपछि मन्त्रालयले आकस्मिक कदम चालेको हो । अर्थमन्त्री खनालले तत्कालै अध्ययन कार्यदल गठन गर्दै बजारमा देखिएको असामान्य अवस्थाको मूल कारण पत्ता लगाउन निर्देशन दिएका छन् ।
नेपाल धितोपत्र बोर्डका कायममुकायम कार्यकारी निर्देशक रुपेश केसीको संयोजकत्वमा गठित कार्यदलमा नेपाल राष्ट्र बैंकका निर्देशक शरण अधिकारी, नेपाल स्टक एक्सचेन्जका कामु कार्यकारी निर्देशक निरञ्जन फुँयाल सदस्य र अर्थ मन्त्रालयका उपसचिव शरद निरौला सदस्यसचिव रहेका छन् । कार्यदलले पुँजी बजारमा उत्पन्न समस्या र विकृति अध्ययन गरेर आम लगानीकर्ताको मनोबल वृद्धिका लागि तत्काल लिनुपर्ने प्रणालीगत तथा प्रक्रियागत सुधारबारे सुझाव पेस गर्नेछ।
साथै, ठोस कार्यान्वयन कार्ययोजना पनि तयार गर्नेछ । अर्थ मन्त्रालयले ५ दिनभित्र प्रतिवेदन बुझाउन कार्यदललाई निर्देशन दिएको छ । यसले बजार स्थिरता र लगानीकर्ताको विश्वास पुनःस्थापना गर्ने ठोस उपायसमेत सुझाउने अपेक्षा लिइएको छ ।

























