
काठमाडौं । जेनजी आन्दोलनका क्रममा भएको तोडफोड र आगजनीले निजी क्षेत्रमा करिब ८० अर्ब रुपैयाँ बराबरको क्षति पुर्याएको प्रारम्भिक अनुमान गरिएको छ ।
आइतबार सिंहदरबारमा प्रधानमन्त्री सुशीला कार्की र उद्योगी–व्यवसायीबीच भएको छलफलमा व्यवसायीहरूले आन्दोलनले पारेको असरबारे विस्तृत जानकारी गराएका थिए । प्रधानमन्त्री कार्कीले व्यवसायीहरूसँगको छलफलमा निजी क्षेत्रलाई सदैव साथ दिने प्रतिबद्धता व्यक्त गरिन् ।
उनले आन्दोलनका कारण भएको क्षतिप्रति दुःख प्रकट गर्दै प्रभावित उद्योग तथा व्यवसायको पुनःउत्थानका लागि सरकार तयार रहेको बताइन् । उद्योगी–व्यवसायीहरूले छलफलमा कर्जा पुनर्संरचना तथा पुनर्तालिकीकरण सुविधा उपलब्ध गराउन, लगानी प्रोत्साहनका लागि कर छुट दिन र प्रभावित व्यवसायलाई राहत प्याकेज ल्याउन सरकारसँग आग्रह गरे ।
साथै, सुरक्षित र स्थिर वातावरणमा काम गर्नसक्ने व्यवस्था मिलाउन पनि माग गरेका छन् । नेपाल उद्योग वाणिज्य महासंघका अध्यक्ष चन्द्रप्रसाद ढकालका अनुसार प्रधानमन्त्री कार्कीले सबै सुझावलाई सकारात्मक रूपमा लिएकी छन् । उनले सरकारको प्रतिबद्धताबाट निजी क्षेत्र आशावादी बनेको उल्लेख गरे ।
व्यवसायीहरूले आन्दोलनका क्रममा घुसपैठ गर्ने समूहका कारण ठूलो जनधनको क्षति भएको भन्दै दोषीहरूलाई कारबाहीको दायरामा ल्याउन पनि जोड दिएका छन् । व्यवसायलाई सम्मानजनक ढंगले सञ्चालन गर्न सुरक्षाको सुनिश्चितता अत्यावश्यक रहेको उनीहरुको भनाइ छ ।

























