
काठमाडौं । नेपाल नम्बर एक एमेच्योर गल्फर सद्भाव आचार्य र राहुल विश्वकर्माले एसिया–प्यासिफिक एमेच्योर च्याम्पियनसिप खेल्ने भएका छन् ।
दुबईस्थित इमिरेट्स गल्फ क्लबमा अक्टोबर २३ देखि २६ तारिखसम्म हुने च्याम्पियनसिपमा भाग लिन सोमबार दुबई प्रस्थान गर्ने राहुललाई राष्ट्रिय खेलकुद परिषद्का सदस्यसचिव टंकलाल घिसिङले आइतबार एक कार्यक्रमबीच बिदाइ गरे ।
अमेरिकामा उच्च अध्ययनसँगै एनसीएए डिभिजन वान खेलिरहेका सद्भाव त्यतैबाट दुबई जाने छन् ।
सद्भाव र राहुल दुवैले प्रतियोगिताअघि २ अभ्यास राउन्ड खेल्ने छन् । उक्त च्याम्पियनसिपमा एसिया–प्यासिफिक क्षेत्रका उत्कृष्ट एमेच्योर खेलाडीहरूले प्रतिस्पर्धा गर्नेछन् ।
यो प्रतियोगितामा नेपालको अहिलेसम्मको उत्कृष्ट प्रदर्शन गर्ने खेलाडी सुवास तामाङ हुन् । उनले २०२२ मा कट बनाएका थिए । उनी बाहेक अन्य नेपाली गल्फ खेलाडीले कट बनाउन सकेका छैनन् ।
यो पटक सद्भावले अमेरिकाको अनुभव र राहुलले पनि भारतको तरुण सरदेशाई एकेडेमीमा प्रशिक्षण गरेर तयारी गरेकाले उत्कृष्ट नतिजाको अपेक्षा गरिएको नेपाल गल्फ संघले जनाएको छ ।
एसिया–प्यासिफिक एमेच्योर च्याम्पियनसिपको विजेताले द मास्टर्स प्रतियोगिता र द ओपन च्याम्पियनसिपमा स्थान पक्का गर्ने छन् ।

























