चौपायालाई खोरेतमुक्त बनाउने अभियान कोशी प्रदेशभरि विस्तार गरिँदै

विराटनगर । विराटनगर महानगरपालिकालाई खोरेत रोगमुक्त पालिका बनाउने लक्ष्यका साथ गाई र भैँसीमा निःशुल्क खोप अभियान सुरु गरिएको छ । यो अभियानले विराटनगरलाई खोरेतमुक्त बनाउने दाबी गरिएको छ, जुन खोरेतमुक्त कोशी प्रदेश बनाउने प्रदेश सरकारको बृहत् लक्ष्यअन्तर्गत पर्दछ ।

महानगरपालिकाको आयोजना तथा कोशी प्रदेश सरकार र भेटनरी अस्पताल मोरङको सहकार्यमा विराटनगर–१२ स्थित बञ्जरा एग्रो फार्मबाट औपचारिक रूपमा अभियानको शुभारम्भ गरियो ।

Advertisement

महानगरको आर्थिक विकास समितिका संयोजक श्याम घिमिरेले गाईलाई खोप लगाएर यो अभियानको उद्घाटन गरे । विराटनगर महानगरभित्र हाल २१ हजार ६ सय गाई र भैँसी रहेकोमा पहिलो चरणमा १६ हजार ६ सय गाई र भैँसीलाई निःशुल्क खोप लगाइनेछ ।

खोप कार्य भ्याक्सिनेटरमार्फत गराइनेछ भने तथ्याङ्कहरू डिजिटल प्रणालीबाट अभिलेख राखिने व्यवस्था मिलाइएको छ । भेटनरी अस्पतालका प्रमुख डा. अजयकुमार साहका अनुसार, मोरङ जिल्लाभरमा ३ लाख ८० हजार डोज खोप वितरण गरिने लक्ष्य छ ।

कोशी प्रदेशको पशुपन्छी तथा मत्स्य विकास निर्देशनालयका निर्देशक डा. सुशीलकुमार अधिकारीले यो खोप अभियान प्रदेशका सबै १३७ वटै पालिकामा सञ्चालन गरिने जानकारी दिए ।

इलाम जिल्लालाई पहिले नै खोरेतमुक्त घोषणा गरिसकिएको छ । झापा, मोरङ, सुनसरी र उदयपुरलाई पनि खोरेत रोगमुक्त जिल्ला बनाउन तयारी र अभियान अघि बढिसकेको छ ।