
विराटनगर । विराटनगरमा रहेको श्रृष्टि बचत तथा ऋण सहकारी संस्था (साकोस) को २९ औं वार्षिक साधारणसभा निर्वाचनसहित शनिबार सम्पन्न भएको छ । साधारण सभाले आगामी चार वर्षका लागि निवास पोखरेललाई अध्यक्षमा सर्वसम्मत निर्वाचित गरेको छ ।
पोखरेलको नेतृत्वमा ११ सदस्यीय सञ्चालक समिति र तीन सदस्यीय लेखा सुपरिवेक्षण समिति पनि सर्वसम्मत चयन भएका छन् । सञ्चालक समितिको उपाध्यक्षमा डम्बर बहादुर कार्की र सचिवमा लिलानाथ गौतम निर्वाचित हुँदा लेखा सुपरिवेक्षण समितिको संयोजकमा अच्युत भट्टराई चुनिएका छन् ।
सहकारीका निवर्तमान अध्यक्ष मोहनप्रसाद भट्टराईको अध्यक्षता तथा समस्याग्रस्त सहकारी व्यवस्थापन समितिका सदस्य जीवन काफ्लेको प्रमुख आतिथ्यतामा सम्पन्न साधारण सभामा अध्यक्ष भट्टराईले वार्षिक प्रगति प्रतिवेदन प्रस्तुत गरेका थिए । प्रतिवेदनअनुसार सहकारीको वित्तीय अवस्था सुदृढ देखिएको छ ।

संस्थाको शेयर पूँजी २ करोड ५० लाख ०६ हजार एक सय रुपैयाँ रहेको छ भने बचत ९ करोड ६० लाख ९१ हजार ३७६ रुपैयाँ ७५ पैसा पुगेको छ । सहकारीले सदस्यहरूलाई १० करोड ०८ लाख ४५ हजार ५७६ रुपैयाँ ऋण लगानी गरेको छ ।
श्रृष्टि साकोसमा हाल १९९२ जना शेयर सदस्य आबद्ध छन्, जसमा पुरुष सदस्य ९४७ जना र महिला सदस्य एक हजार ४५ जना छन् । सहकारीले आर्थिक वर्ष २०८१/०८२ मा २८ करोड ९८ लाख ०२ हजार ६३९ रुपैयाँ ५३ पैसाको कारोबार गरेको थियो भने आर्थिक वर्ष २०८२/०८३ मा कारोबारमा वृद्धि भई ३१ करोड ६९ लाख २४ हजार ४३० रुपैयाँ ९० पैसा पुगेको जनाएको छ । संस्थाले आगामी आर्थिक वर्ष २०८३/०८४ मा ३३ करोड ५४ लाख ६२ हजार ५१९ रुपैयाँ ५९ पैसा कारोबार गर्ने महत्त्वाकाङ्क्षी लक्ष्य लिएको छ ।
आम्दानीतर्फ पनि सहकारीले उत्साहजनक प्रगति गरेको छ । आर्थिक वर्ष २०८१/०८२ मा १ करोड ७१ लाख १२ हजार ८७९ रुपैयाँ ३३ पैसा आम्दानी गरेकोमा आर्थिक वर्ष २०८२/०८३ मा यो बढेर २ करोड ०३ लाख ८२ हजार १३८ रुपैयाँ ७८ पैसा पुगेको प्रतिवेदनमा उल्लेख छ ।
साधारण सभाको अवसरमा संस्थाले असल बचतकर्ता गोविन्द बहादुर श्रेष्ठ, विमला कुमारी बाँनीया तथा असल ऋणी प्रेम घिमिरे र हेमा कुमारी राजवंशीलाई प्रमाणपत्र र नगद ३ हजारसहित सम्मान गरेको थियो । साथै, शेयर सदस्यका सन्ततिमध्ये प्लस टु तर्फ उत्कृष्ट अंक ल्याउने भरोषा दाहाललाई प्रशंसापत्रसहित नगद पुरस्कार प्रदान गरिएको सहकारीका लेखापाल प्रकाश सापकोटाले जानकारी दिए ।

























