
काठमाडौँ । नेपाल र बङ्गलादेशबीच ऊर्जा सचिवस्तरीय बैठकमा सुनकोशी–३ जलविद्युत् आयोजनामा बङ्गलादेशले लगानी गर्ने निश्चित भएको छ। साथै, बङ्गलादेशले नेपालबाट तत्काल थप २० मेगावाट बिजुली खरिद गर्ने सहमति जनाएको छ।
ऊर्जा मन्त्रालयका अनुसार, सुनकोशी–३ आयोजनामा लगानीको प्रक्रिया अगाडि बढाउन बङ्गलादेशले आयोजनाको मूल्याङ्कनका लागि विशेषज्ञ समिति गठन गर्नेछ। हाल नेपालबाट बङ्गलादेशतर्फ ४० मेगावाट विद्युत् बिक्री भइरहेकोमा अब थप २० मेगावाट किन्ने सहमति भएको छ।
यससँगै बङ्गलादेशले नेपालबाट कुल ६० मेगावाट बिजुली खरिद गर्नेछ। ऊर्जा सचिव चिरञ्जिवी चटौतको नेतृत्वमा रहेको नेपाली टोली हाल बङ्गलादेशमा वार्ताका लागि उपस्थित छ।
नेपाल, भारत र बङ्गलादेशबीच ऊर्जा क्षेत्रमा सहकार्यका लागि समझदारीपत्रमा सहमतिका लागि दुवै पक्षले भारतसँग पहल गर्ने विषयमा पनि समझदारी भएको ऊर्जा मन्त्रालयका प्रवक्ता सन्दीप कुमार देवले जारी गरेको प्रेस विज्ञप्तिमा उल्लेख छ।

























