विराटनगरका स्वीकृतले दुबईमा जिते रजत पदक

काठमाडौं। दुबईमा भइरहेको पाँचौँ एसियाली यूथ पारा गेम्सअन्तर्गत टेबल टेनिसको यू २३ पुरुष सिंगल (क्लास ७) मा स्वीकृत न्यौपानेले रजत जितेका छन् ।

रजत पदक विजेता न्यौपाने विराटनगरका हुन् । उनी विराटनगरको स्टेलर टेबल टेनिस सेन्टरका प्रशिक्षक बिकेन थापासँग प्रशिक्षण गर्दै आएका थिए ।

स्वीकृत समूह चरणमा पहिलो हुँदै सेमिफाइनलमा पुगेका थिए । समूह चरणमा स्वीकृतले काजकिस्तान, किर्गिस्तान र इराकका खेलाडीलाई पराजित गरेका थिए ।

सेमिफाइनलमा स्वीकृतले फिलिपिन्सका खेलाडीलाई ३–१ ले हराउँदै फाइनलमा स्थान सुरक्षित गरेका थिए । फाइनलमा स्वीकृत चाइनिज ताइपेइसँग २–३ ले चुके ।