
झापा । चालु आर्थिक वर्ष २०८२–०८३ को मंसिर मसान्तसम्ममा पूर्वीनाका काँकरभिट्टाबाट झन्डै ८ अर्ब रूपैयाँ बराबरको इन्धन आयात भएको छ ।
मेची भन्सार कार्यालयको तथ्यांक अनुसार ५ महिनाको अवधिमा पेट्रोल, डिजेल, एलपी ग्यास, एटीएफ र मट्टितेल गरी कुल ७ अर्ब ८४ करोड ४० लाख २३ हजार रुपैयाँ बराबरको पेट्रोलियम पदार्थ आयात भएको हो । पूर्वी नेपालका लागि मुख्य आपूर्ति नाका मानिने काँकरभिट्टाबाट इन्धन आयात निरन्तर बढ्दो क्रममा देखिएको छ ।
अघिल्लो आर्थिक वर्ष २०८१–८२ को सोही अवधिसँग तुलना गर्दा चालु वर्षमा पेट्रोलियम पदार्थको आयात २३ करोड ५२ लाख ७० हजार रुपैयाँले वृद्धि भएको छ । प्रतिशतका हिसाबले यो वृद्धि ३.१० प्रतिशत हो । आयात बढेसँगै राजस्व संकलनमा पनि सकारात्मक प्रभाव परेको छ । इन्धन आयातबाट प्राप्त राजस्व २.५० प्रतिशतले बढेर ९ करोड ४२ लाख ९५ हजार रुपैयाँले वृद्धि भएको मेची भन्सार कार्यालयका सूचना अधिकारी ईश्वरकुमार हुमागाईंले जानकारी दिए ।
कार्यालयका अनुसार चालु आवको ५ महिनामा मात्रै पेट्रोलियम पदार्थ आयातबाट ३ अर्ब ८० करोड ५८ लाख ६४ हजार रुपैयाँ राजस्व संकलन भएको छ । यो रकम अघिल्लो वर्षको तुलनामा उल्लेख्य मानिन्छ । भन्सार कार्यालयले जनाएअनुसार यस अवधिमा ३ अर्ब ८२ करोड ७० लाख रुपैयाँ मूल्य बराबरको ४३ हजार १ सय ६० किलोलिटर पेट्रोल आयात भएको छ भने २ अर्ब ५३ करोड १६ लाख रुपैयाँ मूल्यको २६ हजार १ सय २० किलोलिटर डिजेल भित्रिएको छ ।
त्यसैगरी, घरायसी तथा व्यावसायिक प्रयोजनका लागि प्रयोग हुने एलपी ग्यासको आयात पनि ठूलो परिमाणमा भएको छ । ५ महिनामा १ अर्ब १ करोड ६० लाख रुपैयाँ मूल्य बराबरको १० हजार ४ सय ८० मेट्रिक टन एलपी ग्यास आयात भएको भन्सारको तथ्यांकमा उल्लेख छ । हवाई इन्धनका रूपमा प्रयोग हुने एटीएफ ३ हजार ५ सय ८० किलोलिटर आयात हुँदा यसको मूल्य ३२ करोड ८२ लाख रुपैयाँ पुगेको छ भने मट्टितेल ६ सय ८० किलोलिटर आयात हुँदा ६ करोड ३१ लाख रुपैयाँ बराबरको कारोबार भएको छ ।
काँकरभिट्टा नाकाबाट हुने इन्धन आयातले पूर्वी क्षेत्रको आपूर्ति सहज बनाउनुका साथै सरकारी राजस्व वृद्धिमा पनि महत्वपूर्ण योगदान पुर्याइरहेको देखिन्छ । बढ्दो आर्थिक गतिविधि, यातायात तथा उद्योग व्यवसायको विस्तारसँगै आगामी दिनमा पेट्रोलियम पदार्थको आयात अझै बढ्ने देखिन्छ ।

























