
लेटाङ । ‘लेटाङ रन’ को तेस्रो संस्करण आउँदो माघ १ गते हुने भएको छ। आयोजक लेटाङ रनले मंगलबार पत्रकार सम्मेलन गर्दै करिब ८ सय धावकको सहभागितामा प्रतियोगिता सञ्चालन गरिने जानकारी दिएको छ । लेटाङ रनका अध्यक्ष किरण राईले यस वर्षको दौड गत वर्षको भन्दा बृहत्तरूपमा र व्यापक सहभागितामा सञ्चालन गर्न लागिएको बताए । यसमा राष्ट्रिय तथा अन्तर्राष्ट्रिय स्तरका धावकहरू समेत सहभागी हुने उनको भनाइ छ ।
प्रतियोगितामा ४ वटा विधामा महिला र पुरुषतर्फ गरी ८ वटा प्रतिस्पर्धा सञ्चालन गरिनेछ । सबैभन्दा ठूलो पुरस्कार राशिको खुला १० किलोमिटर म्याराथन प्रतियोगितामा देश विदेशका खेलाडीहरूले भाग लिनेछन् । यस विधामा प्रथम हुने महिला र पुरुष दुवैले मेडलसहित ३० हजार, दोस्रोले १५ हजार, तेस्रोले ८ हजार र सान्त्वना दुई जनाले १/१ हजार नगद पुरस्कार पाउनेछन् ।
लेटाङ नगरपालिका भित्रका धावकहरू मात्र सहभागी हुन पाउने ‘हाम्रो लेटाङ’ विधामा पनि महिला र पुरुष दुवैतर्फ प्रतिस्पर्धा हुनेछ । प्रथम हुनेले मेडलसहित ७ हजार, दोस्रोले ४ हजार, तेस्रोले ३ हजार र सान्त्वना दुई जनाले १/१ हजार नगद पुरस्कार पाउनेछन् ।
यस्तै, भेट्रान महिला र पुरुषतर्फको म्याराथनमा प्रथम हुनेले मेडलसहित १० हजार, दोस्रोले ५ हजार र तेस्रोले ४ हजार नगद पुरस्कार पाउनेछन् । कक्षा ८ भन्दा तल अध्ययनरत विद्यार्थीहरूको महिला र पुरुष दुवैतर्फको प्रतिस्पर्धामा प्रथम हुनेले मेडलसहित ५ हजार, दोस्रोले ३ हजार र तेस्रोले २ हजार रुपैयाँ नगद पुरस्कार पाउनेछन् ।
खुला महिला र पुरुष, हाम्रो लेटाङ महिला र पुरुष, भेट्रान महिला र पुरुष विधाका लागि ४ सय रुपैयाँ दर्ता शुल्क तोकिएको छ। कक्षा ८ भन्दा तलका प्रतिस्पर्धीका लागि ३ सय ५० रुपैयाँ दर्ता शुल्क लाग्नेछ । प्रतियोगिता माघ १ गते बिहान ८ बजे लेटाङ बजारको वीपी चोकबाट सुरु भई निर्धारित दूरी पूरा गरेर पुनः सोही चोकमा आएर सम्पन्न हुनेछ ।
प्रतियोगिता सञ्चालन गर्न लेटाङ नगरपालिका, वडा कार्यालय, सामुदायिक वन, हाल युकेमा रहेका स्थानीयवासी सन्तोष राई लगायत विभिन्न संस्था र व्यक्तिहरूले सहयोग गरेका छन्। लेटाङ रन सम्पन्न गर्न करिब ९ लाख रुपैयाँ लागत लाग्ने पत्रकार सम्मेलनमा जानकारी दिइएको छ । लेटाङ नगरपालिकालाई चिनाउने उद्देश्यले पनि प्रतियोगिता आयोजना गरिएको हुनाले प्रतियोगितामा सहभागी भएर तथा दर्शकको रूपमा उपस्थित भएर समेत सहयोग गरिदिन आयोजकले सबै समक्ष आग्रह गरेको छ ।
युवाहरूलाई खेलकुदतर्फ आकर्षित गर्दै लागुऔषध दुर्व्यसनको कुलतमा लाग्नबाट टाढै राख्ने उद्देश्यले प्रतियोगिता आयोजना गरिएको लेटाङ रनका सदस्य तथा कमलपुर सामुदायिक वन उपभोक्ता समूहका अध्यक्ष गोपाल श्रेष्ठले जानकारी दिएका छन् । लेटाङ रनकी सचिव मनकुमारी राईले यस वर्ष महिला र पुरुष दुवैतर्फको पुरस्कार राशि समान राखिएकाले महिला धावकहरूलाई उत्साहपूर्वक प्रतियोगितामा सहभागी हुन आह्वान गरेकी छन् ।

























