
विराटनगर । विराटनगरमा तमु ल्होसार २०८२ (त ल्हो) को अवसरमा सद्भावपूर्ण दौड प्रतियोगिता आयोजना गरिएको छ ।
तमु ह्युल छोंज धीं गुरुङ राष्ट्रिय परिषद् विराटनगर नगर इकाई समितिले आयोजना गरेको प्रतियोगिता खुला महिलातर्फ अर्चना चौधरी प्रथम, पार्वती कायस्थ द्वितीय र भूमिका माझी तृतीय भए भने पुरुषतर्फ नितेश भट्टराई प्रथम, सुरज चौधरी द्वितीय र प्रियान्सु चौधरी तृतीय भए ।

त्यस्तै, ५० वर्षमाथि पुरुषतर्फ सुबोध चौधरी प्रथम भए । अन्य प्रतियोगीसँगै दौड पूरा गरेका बालक साइमन गुरुङलाई सान्त्वना पुरस्कार प्रदान गर्ने आयोजक समितिका कार्यवाहक अध्यक्ष श्याम गुरुङले जानकारी दिए ।
प्रतियोगितामा ५० जनाभन्दा बढीले सहभागिता जनाएका थिए ।
उनीहरू ३ किलोमिटर दूरी पारेका थिए । दौड प्रतियोगिताको उद्घाटन बुढीगंगा गाउँपालिकाका अध्यक्ष जितनारायण थापा मगरले गरेका थिए । प्रतियोगिताका विजयी खेलाडीलाई तमु ल्होसारको अवसरमा मंगलबार हुने विशेष कार्यक्रममा पुरस्कार प्रदान गरिने छ ।

























