
काठमाडौँ । नेपाल भित्रिने रेमिट्यान्स (विप्रेषण) मा उल्लेखनीय वृद्धि भएको छ। नेपाल राष्ट्र बैंकले सार्वजनिक गरेको आर्थिक वर्ष २०८२/८३ को पाँच महिनाको तथ्याङ्क अनुसार विप्रेषण आप्रवाह ३५.६ प्रतिशतले बढेर ८ खर्ब ७० अर्ब ३१ करोड रुपैयाँ पुगेको हो।
अघिल्लो वर्षको सोही अवधिमा रेमिट्यान्स वृद्धिदर मात्र ४.७ प्रतिशत रहेको थियो। राष्ट्र बैंकका अनुसार २०८२ मङ्सिर महिनामा मात्रै १ खर्ब ८३ अर्ब १८ करोड रुपैयाँ रेमिट्यान्स भित्रिएको छ, जबकि अघिल्लो वर्षको मङ्सिरमा १ खर्ब १८ अर्ब ७९ करोड रुपैयाँ मात्र आएको थियो।
अमेरिकी डलरमा पनि रेमिट्यान्सको वृद्धिदर बलियो देखिएको छ। समीक्षा अवधिमा डलर आप्रवाह २९ प्रतिशतले बढेर ६ अर्ब १६ करोड पुगेको छ। अघिल्लो वर्ष यस्तो वृद्धिदर ३.४ प्रतिशत मात्र थियो। यस्तै, खुद द्वितीय आय (खुद ट्रान्सफर) पनि ७ खर्बबाट बढेर ९ खर्ब ५४ अर्ब ७८ करोड रुपैयाँ पुगेको छ।
वैदेशिक रोजगारीको तथ्याङ्क हेर्दा, समीक्षा अवधिमा नयाँ श्रम स्वीकृति (संस्थागत तथा व्यक्तिगत) लिने नेपालीको सङ्ख्या १ लाख ७५ हजार ५ सय ९१ रहेको छ। अघिल्लो वर्ष यो सङ्ख्या १ लाख ९० हजार ३ सय ८४ थियो। नयाँ श्रम स्वीकृति लिनेको सङ्ख्यामा केही गिरावट आए पनि पुनः श्रम स्वीकृति लिनेको सङ्ख्या भने बढेको छ। यस अवधिमा १ लाख ६३ हजार ९ सय २४ जनाले पुनः श्रम स्वीकृति लिएका छन्, जुन अघिल्लो वर्ष १ लाख ३५ हजार ४ सय २५ मात्र थियो।

























