
विराटनगर । मोरङको विराटनगर महानगरपालिका–१६ दरैयाबाट प्रहरीले अवैध रूपमा भन्सार छली ल्याउँदै गरेको माछासहित एक युवकलाई नियन्त्रणमा लिएको छ। बुधबार बिहान करिब १०:३० बजे इलाका प्रहरी कार्यालय रानीबाट खटिएको विशेष टोलीले उक्त बरामद गरेको हो।
प्रहरी वरिष्ठ नायब निरीक्षक तिलक कार्कीको कमाण्डमा खटिएको सात जनाको प्रहरी टोलीले दरैयाबाट विराटनगरतर्फ आउँदै गरेको को १९ प १३१ नम्बरको मोटरसाइकललाई शङ्कास्पद अवस्थामा रोकेर चेकजाँच गरेको थियो। सो क्रममा मोटरसाइकलको पछाडि दुई वटा कार्टुनमा लोड गरिएको ८० केजी रहु र विकासी जलकपुर माछा फेला परेको प्रहरीले जनाएको छ।
पक्राउ पर्नेमा विराटनगर महानगरपालिका–६ बस्ने २१ वर्षीय बिक्की सहनी रहेका छन्। प्रहरीका अनुसार बरामद गरिएको माछाको अनुमानित मूल्य २४ हजार र मोटरसाइकलको ५० हजार गरी जम्मा ७४ हजार रुपैयाँ बराबरको सामान नियन्त्रणमा लिइएको छ।
नियन्त्रणमा लिइएका सहनी र मोटरसाइकललाई आवश्यक कारबाहीका लागि इलाका प्रहरी कार्यालय रानीमा राखिएको छ। बरामद गरिएको माछा क्वारेन्टाइन कार्यालय रानीसँग समन्वय गरी नष्ट गर्ने तयारी भइरहेको र अन्य आवश्यक कानुनी प्रक्रिया अगाडि बढाइएको प्रहरीले जानकारी दिएको छ।

























