
विराटनगर । उद्योग संगठन मोरङले कोशी प्रदेशको औद्योगिक विकास र क्षेत्रीय व्यवसायबीचको सहकार्यलाई सुदृढ बनाउने उद्देश्यका साथ सञ्चालन गरेको तीन दिने ‘कोशी कनेक्ट’ व्यावसायिक मिशन सफलतापूर्वक सम्पन्न भएको छ। माघ २ गते कोशी प्रदेशका पर्यटन, वन तथा वातावरण मन्त्री भीम पराजुलीले संगठनको प्रतिनिधिमण्डललाई बिदाइ गरेसँगै सुरु भएको यो अभियान माघ ४ गते सम्पन्न भएको हो। यस मिशनले तराई र पहाडी जिल्लाका व्यवसायीबीच व्यावसायिक सम्बन्ध प्रगाढ बनाउनुका साथै लगानीका नयाँ सम्भावनाहरू उजागर गरेको संगठनले जनाएको छ।
भ्रमणको पहिलो दिन माघ २ गते उदयपुर पुगेको प्रतिनिधिमण्डलले त्रियुगा उद्योग वाणिज्य संघ र स्थानीय व्यवसायीसँग बीटुबी (B2B) बैठक सम्पन्न गरेको थियो। सो अवसरमा उदयपुरमा उत्पादित वस्तुहरूलाई प्रशोधन उद्योगमार्फत मूल्य अभिवृद्धि गरी किसान र उद्यमी दुवैलाई लाभ पुर्याउने विषयमा विस्तृत छलफल भएको संगठनका अध्यक्ष नन्दकिशोर राठीले जानकारी दिए। उदयपुरमा उद्योग क्लस्टर विकास गर्न र निजी क्षेत्रको लगानी तथा ज्ञान भित्र्याउन संगठन र संघले आगामी दिनमा संयुक्त पहल गर्ने सहमतिसमेत भएको छ।
भ्रमणको दोस्रो दिन माघ ३ गते खोटाङ उद्योग वाणिज्य संघ र स्थानीय व्यवसायीसँग भएको छलफल धार्मिक, सांस्कृतिक र प्राकृतिक पर्यटनमा केन्द्रित रहेको थियो। अध्यक्ष राठीका अनुसार खोटाङमा होटल तथा होमस्टे विकासको प्रचुर सम्भावना रहेकाले त्यसमा सहकार्य गर्ने र स्थानीय उत्पादनको वितरण प्रणालीलाई मजबुत बनाउँदै व्यवसायलाई प्रतिस्पर्धी बनाउने विषयमा सहमति जुटेको छ। त्यस्तै, अन्तिम दिन माघ ४ गते भोजपुर उद्योग वाणिज्य संघका प्रतिनिधिहरूसँग आपसी व्यापार सुदृढ गर्ने, स्थानीय उत्पादनको प्रवर्द्धन गर्ने र पहाड एवं तराईलाई साझा विकासको दिशामा अघि बढाउने विषयमा महत्त्वपूर्ण संवाद भएको छ।
यस व्यावसायिक अभियानले अन्तरजिल्ला व्यापारिक सञ्जाल स्थापना, स्वदेशी उत्पादनको बजार विस्तार र आर्थिक एजेन्डामा साझा धारणा निर्माण गर्न ठूलो सहयोग पुर्याएको संगठनका महानिर्देशक चुडामणि भट्टराईले बताए। मिशनमा संगठनका निवर्तमान अध्यक्ष राकेश सुराना, वरिष्ठ उपाध्यक्ष भोलेश्वर दुलाल, उपाध्यक्षहरू सुरेन्द्र गोल्छा, विपिन कावरा र सुवोध कोइराला, कोषाध्यक्ष पारस लुनियासहित कार्यसमिति सदस्यहरू र युवा तथा महिला उद्यमीहरूको बाक्लो सहभागिता रहेको थियो। यस अभियानले कोशी प्रदेशका निजी क्षेत्रबीच दिगो व्यावसायिक साझेदारी निर्माणमा नयाँ इँटा थपेको संगठनको निष्कर्ष छ।

























