
विराटनगर । काठमाडौंमा आयोजना हुन लागेको राष्ट्रिय कबड्डी प्रतियोगितामा सहभागी हुने कोशी प्रदेशका खेलाडी तथा अफिसियललाई बिदाइ गरिएको छ ।
कोशी प्रदेशका सामाजिक विकास मन्त्री रामप्रसाद मेहताले प्रदेश खेलकुद विकास बोर्डको अध्यक्षको रूपमा पदबहाली गर्दै कबड्डीका खेलाडीलाई बिदाइ गरेका हुन् । विराटनगरस्थित बोर्डको कार्यालयमा पदबहाली गर्दै मन्त्री मेहताले काठमाडौंमा आयोजना हुने राष्ट्रिय कबड्डी प्रतियोगितामा सहभागी हुने २४ जना खेलाडी तथा अफिसियल टोलीलाई बिदाइ गरे ।
खेलाडी र अफिसियलहरूलाई बिदाइ गर्दै मन्त्री मेहताले जितको शुभकामना दिँदै, खेलाडीहरू ‘राष्ट्रका गहना’ भएको बताए । उनले खेल र खेलाडीले नै प्रदेशको गरिमा र प्रतिष्ठा उच्च राख्ने उल्लेख गर्दै प्रतियोगितामा प्रथम स्थान (स्वर्ण पदक) हासिल गर्ने अपेक्षा राखेको र खेलकुदमा सरकारले लगानी गर्ने विश्वास दिलाए ।
गत पुस २२ गते मन्त्री नियुक्त भएका मेहताले खेलकुद क्षेत्रको विकासका लागि सरकारले आवश्यक लगानी गर्ने र खेलाडीहरूलाई प्रोत्साहन गर्ने प्रतिबद्धता समेत व्यक्त गरे ।
सोही अवसरमा बोर्डका अधिकृत विनोद पाण्डेले कोशी प्रदेशको खेलकुद उपलब्धिबारे जानकारी गराएका थिए । पाण्डेका अनुसार माघ ३ र ४ गते हेटौँडामा सम्पन्न राष्ट्रिय जुडो प्रतियोगितामा कोशी प्रदेशले २ रजत र २ कांस्य पदक प्राप्त गर्न सफल भएको छ । सात प्रदेश र तीन विभागीय टोलीको सहभागिता रहेको उक्त प्रतियोगितामा कोशीका खेलाडीले उत्कृष्ट प्रदर्शन गरेको उनले बताए ।
पदबहाली तथा बिदाइ कार्यक्रममा बोर्डका कर्मचारी, खेलकुद क्षेत्रका प्रतिनिधि र खेलाडीहरूको उपस्थिति रहेको थियो ।

























