
काठमाडौँ । साताको तेस्रो दिन मंगलबार सेयर बजार (नेप्से) परिसूचकमा ठूलो गिरावट आएको छ। बजार बन्द हुँदासम्म नेप्से ४२.५८ अङ्कले घटेर २७२६.५१ विन्दुमा ओर्लिएको छ।
परिसूचक ओरालो लागे पनि कारोबार रकम भने उत्साहजनक देखिएको छ। दिनभरिमा ३३३ वटा कम्पनीको ३ करोड २ लाख कित्ता सेयर खरिदबिक्री हुँदा कुल १४ अर्ब १६ करोड ७१ लाख रुपैयाँ बराबरको कारोबार भएको छ। आज २२४ वटा कम्पनीको मूल्य घट्दा जम्मा ३४ वटा कम्पनीको मूल्यमा सुधार आएको छ।
बजार घटे पनि केही जलविद्युत् र विकास बैंकका लगानीकर्ताले भने कमाएका छन्। सप्तकोशी डेभलपमेन्ट बैंकको सेयर मूल्य सबैभन्दा धेरै ८.५६ प्रतिशतले बढेको छ भने दोर्दी खोला र माया खोला जलविद्युत्को मूल्यमा पनि ८ प्रतिशतभन्दा बढीको सुधार देखिएको छ।
सबैभन्दा धेरै मूल्य घट्नेमा ओम मेगाश्री फर्मास्युटिकल्स र ट्रेड टावर रहेका छन्। समूहगत रूपमा हेर्दा फाइनान्स समूह सबैभन्दा धेरै २.४२ प्रतिशतले घटेको छ। कारोबार रकमका आधारमा राधी विद्युत् कम्पनी ५७ करोड ८५ लाख रुपैयाँसहित अग्रस्थानमा रहेको छ।

























