
विराटनगर । विराटनगरमा जारी हिसान स्पोर्ट्स मिटमा बास्केटबलको उपाधि विराटनगरको बालकल्याण विद्या मन्दिरले (बिकेभिएम) जितेको छ ।
हिसान मोरङले आयोजना गरेको प्रतियोगिताअन्तर्गत बास्केटबलमा बिकेभिएमले शिक्षादीप कलेजलाई पराजित गर्दै उपाधि जितेको हो । बिकेभिएमले शिक्षादीपलाई २८–२५ को स्कोरले हरायो । खेलको प्लेयर अफ द म्याच बिकेभिएमका आयुष दाहाल भए ।
प्रतियोगिताअन्तर्गत क्रिकेटमा कान्तिपुर र शिक्षादीप फाइनलमा प्रवेश गरेका छन् । पहिलो खेलमा शिक्षादीपले अर्किड कलेजलाई २ रनले हराउँदै फाइनलमा पुग्यो । टस जितेर ब्याटिङ गरेको शिक्षादीपले निर्धारित २० ओभरको खेलमा १७ ओभर ४ बलमा सबै विकेट गुमाउँदै १०३ रन बनायो । सोनुकुमार सिंहले ३५ रन बनाए । अर्किडका कृष्ण यादव, नन्दकिशोर यादव र मैसम ठाकुरले २–२ विकेट लिए ।
१०४ रनको लक्ष्य पाएको अर्किडले १७ ओभर २ बलमा सबै विकेट गुमाउँदै १०१ रनमै समेटियो । श्रेयस दाहालले २० रन बनाए । शिक्षादीपका प्लेयर अफ म्याच सोनुकुमार सिंहले ५ विकेट लिए ।
दोस्रो खेलमा कान्तिपुरले अरनिको कलेजलाई १५ रनले हराउँदै फाइनल पुग्यो । टस जितेर ब्याटिङ थालेको कान्तिपुरले २० ओभर खेल्दै ७ विकेटको क्षतिमा १३० रनको चुनौती प्रस्तुत गर्यो । सीताराम कामतले २६ रन बनाए । अरनिकोका साजन यादव, अभिषेक मण्डल र सारस्वर कोइरालाले २–२ विकेट लिए ।
१३१ रनको लक्ष्य पाएको अरनिकोले पूरै ओभर खेल्दै ७ विकेटको क्षतिमा ११५ रन मात्रै बनायो । रोनक राजपुतले २१ रन बनाए । कान्तिपुरका प्लेयर अफ म्याच अरविन्द मण्डल र राजन यादवले २–२ विकेट लिए ।
त्यस्तै, फुटबलको छात्रातर्फको पहिलो खेलमा जेभियर्स कलेजले सेन्टजाेसेफ कलेजलाई टाइब्रकेरबाट ३–१ गोलमा हराउँदै सेमिफाइनलमा प्रवेश गर्यो । प्लेयर अफ म्याच जेभियर्सकी गोलरक्षक प्रमिशा श्रेष्ठ भइन् ।
दोस्रो खेलमा कान्तिपुरले शिक्षादीपलाई टाइब्रकेरमा ४–२ गोलमा हराउँदै सेमिफाइनलमा प्रवेश गरेको छ । प्लेयर अफ म्याच कान्तिपुरकी गोलकिपर रविना चौधरी भइन् ।

छात्रतर्फको पहिलोे खेलमा शिक्षा सन्देशले मोडर्न एरालाई १–० गोलमा पराजित गरी सेमिफाइनलमा प्रवेश गरेको छ । शिक्षा सन्देशका इगल मगरले निर्णायक गोल गर्दै प्लेयर अफ द म्याच भए । दोस्रो खेलमा रेडस्टारले अर्किडलाई १–० को गोलले हराउँदै सेमिफाइनलमा प्रवेश गरेको छ । रेडस्टारका रिसव मगर प्लेयर अफ द म्याच भए ।
त्यसैगरी, भलिबल छात्रतर्फको पहिलो खेलमा राष्ट्र निर्माण कलेजले मोरङ मोडेल कलेजलाई सोझो सेटलले पराजित गरेको छ । प्लेयर अफ द म्याच मोरङ मोडेलका राजेश मरण्डी भए ।
दोस्रो खेलमा बुद्ध कलेजले अर्किडलाई सोझो सेटले पराजित गरेको छ । प्लेयर अफ द म्याच बुद्धका सन्देशकुमार मगर भए ।
तेस्रो खेलमा शिक्षा सन्देशले अरनिकोलाई २५–२०, २१–२५ र २५–२३ को सेटले पराजित गरेको छ । प्लेयर अफ द म्याच शिक्षा सन्देशका अभिषेक श्रेष्ठ भए । छात्रातर्फ पहिलो खेलमा अरनिकोले मोडर्न एरालाई २५–२२, २५–२७ र २५–९ को सेटमा हरायो । प्लेयर अफ द म्याच अरनिकोकी श्रीया लिम्बू भइन् ।
दोस्रो खेलमा शिक्षादीपले कान्तिपुरलाई सोझो सेटमा पराजित गर्यो । प्लेयर अफ द म्याच शिक्षादीपकी रोशा वस्ती भइन् ।

























