
काठमाडौं । सूर्य नेपाल गल्फ टुर २०२५–२६ को पहिलो प्रतियोगिता सूर्य नेपाल सेन्ट्रल ओपनको उपाधि डिफेन्डिङ च्याम्पियन एमेच्योर राहुल विश्वकर्माले जितेका छन् । उनी प्रो र एमेच्योर दुवै तर्फको उपाधि जित्न सफल भए । यो उनको करियरको तेस्रो उपाधि हो ।
प्रोफेसनल खेलाडी जयराम श्रेष्ठलाई १४ स्ट्रोकको फराकिलो अन्तरमा हराउँदै राहुल उपाधि रक्षा गर्न सफल भएका हुन् । प्रतियोगिताको अन्तिम दिन बिहीबार ४–अन्डर ६८ स्कोर गरेका राहुलले समग्रमा १४–अन्डर २ सय ७४ सहित उपाधि जितेका हुन् ।
जयराम श्रेष्ठले खराब प्रदर्शन गर्दै ५–ओभर ७७ स्कोर गर्दा समग्रमा इभन–पार २ सय ८८ सहित दोस्रो स्थान प्राप्त गरे । प्रोतर्फ पहिलो भएका जयरामले १ लाख ७० हजार पुरस्कार प्राप्त गरे ।
समग्रमा २–ओभर २ सय ९० को स्कोरमा तोरणविक्रम शाही र भुवन नगरकोटीले संयुक्त रुपमा तेस्रो स्थान प्राप्त गरे । तोरणले इभन–पार ७२ र भुवनले ४–अन्डर ६८ मा चौथो दिनको खेल सकाए । उनीहरूले १ लाख १२ हजार ५ सय नगद पुरस्कार हात पारे ।
नेपाल नम्बर १ प्रो निरज तामाङले समग्रमा ३–ओभर २ सय ९१ को स्कोरमा ५ औँ स्थान हात पारे । उनले ३–अन्डर ६९ मा खेल सकाए । उनले ८२ हजार नगद पुरस्कार प्राप्त गरे ।
समग्रमा ४–ओभर २ सय ९२ को स्कोरमा भुवनकुमार रोक्का, शुक्रबहादुर राई, दिनेश प्रजापति र एमेच्योर रुबेन थापा संयुक्त रुपमा छैटौँ भए । भुवनले ४–ओभर ७६ खेल्दा शुक्र र दिनेशले २–ओभर ७४ मा खेल पूरा गरे । उनीहरूले ६४ हजार ३ सय ३३ नगद प्राप्त गरे ।
एमेच्योर रुबेनले २–अन्डर ७० स्कोर गरे । रुबेन एमेच्योरतर्फ दोस्रो भए । अर्का एमेच्योर साम डोबलार्ड १० औँ भए । उनले १–ओभर ७३ को स्कोरसहित समग्रमा ८–ओभर २ सय ९६ स्कोर गरे ।
अन्तिम १८ होलको सुरुआत गर्दा ५ स्ट्रोकको अग्रता रहेको राहुललाई अन्य खेलाडीले चुनौती दिन सकेनन् । फ्रन्ट नाइन ३–अन्डर ३३ खेलेसँगै राहुलले उपाधि जित्ने लगभग निश्चित भएको थियो । राहुलले दोस्रो, तेस्रो, ८ औँ र ९ औँ होलमा बर्डी प्रहार गरे । ५ औँ होलमा १ सट खेर फाले । यसपछि १७ औँ होलको बोगीका विरूद्ध १२ औँ र १५ औँ होलको बर्डीले ब्याक नाइन १–अन्डर ३५ मा सकाए ।
जयरामले फ्रन्ट नाइन इभन–पार ३६ मा सकाउने क्रममा पहिलो र दोस्रो होलमा लगातार २ बर्डी प्रहार गरे । तर तेस्रो र ७ औँ होलमा १–१ सट खेर फाले । यसपछि उनले ब्याक नाइन बिर्सनलायक खेले । १० औँ र १२ औँ तथा १४ देखि १६ सम्म लगातार ३ गरी कूल ५ बोगी प्रहार गरे । यो खराब प्रदर्शनमा ब्याक नाइन ५–ओभर ४१ मा सकाए ।
तोरणले फ्रन्ट र ब्याक नाइन दुवै इभन–पार ३६ मा सकाए । फ्रन्ट नाइनमा उनले सबै होलमा पार बचाए । ब्याक नाइनमा १० औँ, १२ औँ र १४औँ होलमा बर्डी प्रहार गरे । तर ५–पारको १५ औँ होलमा डबल बोगीको समान गर्दा १८ औँ होलमा बोगी प्रहार गरे ।
भुवनले फ्रन्ट र ब्याक नाइन दुवै २–अन्डर ३४ मा सकाए । उनले पहिलो, तेस्रो, चौथो तथा १६ देखि १८ होलमा लगातार ३ गरी कूल ६ बर्डी प्रहार गरे । ८ औँ र १४ औँ होलमा १–१ सट खेर फाले ।
७२ होलको प्रतिस्पर्धामा ३७ प्रोफेसनल र २५ एमेच्योर गरी कूल ६२ खेलाडीको सहभागिता रहेको थियो । जहाँ कट बनाउने १८ प्रोफेसनल गल्फरले नगद पुरस्कार प्राप्त गरे । सिजनको पहिलो प्रतियोगिताको कूल पुरस्कार राशि १० लाख ५० हजार रुपैयाँ रहेको थियो ।
प्रतियोगिताका विजयी खेलाडीहरूलाई सूर्य नेपालका डेप्युटी जनरल म्यानेजर केशव प्रधान र नेपाल गल्फ संघका अध्यक्ष टासी घलेले पुरस्कार प्रदान गरे ।

























