टी–२० विश्वकप: इटालीमाथि स्कटल्यान्डको सहज जित

काठमाडौँ। आइसिसी पुरुष टी–२० विश्वकप २०२६ अन्तर्गत सोमबार भएको खेलमा स्कटल्यान्डले इटालीलाई ७३ रनले पराजित गरेको छ। भारतको कोलकातास्थित इडेन गार्डेन्समा टस हारेर पहिले ब्याटिङ गरेको स्कटल्यान्डले निर्धारित २० ओभरमा ४ विकेट गुमाउँदै २०७ रनको विशाल योगफल तयार पारेको थियो।

स्कटल्यान्डका लागि ओपनर जर्ज मुन्सेले विस्फोटक ब्याटिङ गर्दै ५४ बलमा ८४ रन जोडे। उनले माइकल जोन्ससँग पहिलो विकेटका लागि १२६ रनको साझेदारी गर्दै टिमलाई बलियो सुरुवात दिलाएका थिए। जोन्सले ३७ रन जोड्दा ब्रान्डन म्याकमुलनले १८ बलमा अविजित ४१ र माइकल लीस्कले ५ बलमा अविजित २२ रनको महत्वपूर्ण योगदान दिए।

Advertisement

२०८ रनको लक्ष्य पछ्याएको इटाली १६.४ ओभरमा १३४ रनमा समेटियो। इटालीका लागि बेन मानेन्टीले ३१ बलमा ५२ रनको अर्धशतकीय इनिङ्स खेले पनि अन्य ब्याटर चल्न सकेनन्। इटालीका कप्तान वेन म्याडसेन फिल्डिङका क्रममा घाइते भएपछि ब्याटिङ गर्न सकेनन्, जसले टोलीलाई थप दबाबमा पार्यो। स्कटल्यान्डका माइकल लीस्कले बलिङतर्फ पनि चम्किँदै ४ विकेट लिएपछि उनी ‘प्लेयर अफ द म्याच’ घोषित भए।