
काठमाडौ । विश्वभर आज (शुक्रबार) विश्व हिमनदी दिवस विभिन्न कार्यक्रम गरी मनाइँदै छ । संयुक्त राष्ट्रसंघको आह्वानमा गत वर्षदेखि यो दिवस मनाउन सुरु गरिएको हो ।
हरेक वर्ष मार्च २० मा मनाउने गरिन्छ । हिमनदीको महत्व र यसको संरक्षणबारे विश्वव्यापी चेतना अभिवृद्धि गर्ने उद्देश्यले दिवस मनाउन थालिएको हो ।
हिमनदीहरू पृथ्वीको पारिस्थितिक प्रणालीका लागि अत्यन्त महत्वपूर्ण मानिन्छन् । ताजा पानीको प्रमुख स्रोतका रूपमा रहेका हिमनदीहरूले समुद्री सतह सन्तुलनमा राख्न र जैविक विविधताको संरक्षणमा महत्वपूर्ण भूमिका खेल्दै आएका छन् ।
विश्वभर करोडौँ मानिसको दैनिक जीवनयापन प्रत्यक्ष वा अप्रत्यक्ष रूपमा हिमनदीमा निर्भर रहेको तथ्यसमेत सार्वजनिक गरिएको छ । तर, पछिल्लो समय बढ्दो तापक्रमका कारण हिमनदीहरू तीव्र गतिमा पग्लिरहेका छन् ।
हिमनदीहरू तीव्र गतिमा पग्लिएका कारण पानीको अभाव, समुद्री सतह वृद्धि तथा बाढी, पहिरोजस्ता प्राकृतिक विपद्को जोखिम बढाएको विज्ञहरूले बताएका छन् । संयुक्त राष्ट्रसंघले हिमनदी पग्लने दरले विश्वको पारिस्थितिक प्रणाली, मानव जीवन र अर्थतन्त्रमा गम्भीर असर पार्ने खतरा बढाएको भन्दै हरितगृह ग्यास उत्सर्जन घटाउन तत्काल प्रभावकारी कदम चाल्नुपर्ने आवश्यकता औँल्याएको छ ।

























