
काठमाडौं । धावक रामसुन्दर कार्कीले ललितपुरदेखि भारतको उत्तर प्रदेशस्थित अयोध्या मन्दिरसम्मको दौड यात्रा सुरु गरेका छन् ।
करिब ४ सय ५० किलोमिटर दूरी ५५ वर्षीय कार्कीले चैत १३ गते राम नवमीका दिन पूरा गर्ने बताए । दौड अघि नै कार्की र पूर्व खेलाडी गोकुल खत्रीले रुट अवलोकन गरेका थिए ।
गोदावरी नगरपालिका–१ गोदामचौरस्थित कार्कीटारको हनुमान मन्दिरबाट कार्कीले दौड प्रारम्भ गरेका हुन् । उनी त्यहीँका बासिन्दा हुन् । हनुमान मन्दिर पनि कार्की आफैले निर्माण गरेका हुन् । त्यही हनुमान मन्दिरमा २७ फिट अग्लो पितलको गदा निर्माणका लागि सहयोग संकलन गर्न विगतमा अभियानलाई निरन्तरता दिन दौडेको कार्कीले जानकारी गराए ।
मन्दिर परिसरमै सफलताका लागि शुभकामना दिँदै कार्कीका बुवा शिवराम लगायत कार्कीलाई बिदाइ गरेका थिए ।
कार्की यसअघि ललितपुरदेखि जनकपुर ५ पटक, काठमाडौंदेखि दोलखा ३ पटक, काठमाडौं बुटवल १ पटक, काठमाडौंदेखि सिन्धुली ३ पटक र काठमाडौंदेखि उत्तर प्रदेश १ पटक दौडेर पुगेका थिए ।
त्यस्तै, उनले काठमाडौंदेखि भारतको पश्चिम बंगाल हुँदै भुटानको सिमाना फुन्छिुलिङसम्म दौडेका थिए ।कार्कीका अनुसार २०६४ सालमा १ सय १ दिन लगाएर नेपालको तत्कालीन ७५ जिल्ला नै दौडेर पुगेका थिए ।

























