ट्रम्पको ४८ घण्टाको अल्टिमेटम : हर्मुज जलमार्ग नखोले विद्युत केन्द्र ध्वस्त पार्ने धम्की

इरान। अमेरिकी राष्ट्रपति डोनाल्ड ट्रम्पले इरानलाई ४८ घण्टाभित्र हर्मुज जलमार्ग पूर्ण रूपमा र विना अवरोध खोल्न कडा चेतावनी दिएका छन्। सामाजिक सञ्जाल ‘ट्रुथ सोसल’ मा आइतबार पोस्ट गर्दै राष्ट्रपति ट्रम्पले तोकिएको समयभित्र जलमार्ग नखोलिए इरानका विद्युत केन्द्रहरू ध्वस्त पारिदिने धम्की दिएका हुन्।

ट्रम्पले भनेका छन्, ‘यदि इरानले अहिलेको समयबाट ठीक ४८ घण्टाभित्र हर्मुज जलमार्ग पूर्ण रूपमा खोल्दैन भने संयुक्त राज्य अमेरिकाले इरानका विभिन्न विद्युत केन्द्रहरूमा आक्रमण गरी तिनलाई नामेट पारिदिनेछ, जसको सुरुवात सबैभन्दा ठूलो विद्युत केन्द्रबाट हुनेछ।’ यता अमेरिकी सेन्ट्रल कमाण्डले पनि अमेरिकी नागरिक र छिमेकी राष्ट्रहरूविरुद्ध शक्ति प्रदर्शन गर्ने इरानको क्षमतालाई निस्तेज पार्नु नै आफूहरूको स्पष्ट सैन्य उद्देश्य रहेको बताएको छ।

यसैबीच इरानले पनि अमेरिका र इजरायललाई कडा जवाफ फर्काएको छ। इरानी रिभोलुसनरी गार्ड्सको एयरोस्पेस फोर्सका प्रमुख मेजर जनरल सैयद माजिद मुसावीले इरानले इजरायली आकाशमाथि क्षेप्यास्त्र प्रभुत्व कायम गरेको दाबी गरे। उनले अबका आक्रमणहरूले अमेरिकी र इजरायली कमाण्डरहरूलाई स्तब्ध बनाउने चेतावनी दिँदै नयाँ प्रविधिका क्षेप्यास्त्र प्रहार गर्ने संकेत गरेका छन्।

इरानी संसद्का सभामुख एम.बी. कालीबाफले इजरायलको डिमोना जस्तो उच्च सुरक्षा भएको क्षेत्रमा समेत क्षेप्यास्त्र रोक्न असफल हुनुले इजरायली आकाश रक्षाहीन रहेको पुष्टि गरेको बताए। उनले युद्ध अब नयाँ चरणमा प्रवेश गरेको टिप्पणी गरे। अर्कोतर्फ इजरायली वायुसेनाले दक्षिणी सहर अरादमा ब्यालिस्टिक क्षेप्यास्त्र खसेको र आफ्नो रक्षा प्रणाली किन असफल भयो भन्नेबारे अनुसन्धान थालेको छ। इजरायली सञ्चारमाध्यमका अनुसार उक्त क्षेप्यास्त्र रोक्न गरिएका दुईवटा प्रयासहरू विफल भएका थिए।