नम्बर प्लेट फेरेर चलाउँदै गर्दा चोरीको मोटरसाइकल बरामद, विराटनगरबाट भारतीय युवक पक्राउ

विराटनगर । मोरङ प्रहरीले नम्बर प्लेट परिवर्तन गरेर चलाउँदै गरेको अवस्थामा चोरीको मोटरसाइकल बरामद गरेको छ । चोरीको मोटरसाइकसहित भारतीय युवकलाई पक्राउ गरिएको प्रहरीले जनाएको छ ।

मोरङ प्रहरीका सूचना अधिकारी डीएसपी मकेन्द्रकुमार मिश्रका अनुसार विराटनगर महानगरपालिका–११ महेन्द्र चोकबाट हराएको मोटरसाइकल खोजतलासका क्रममा फेला परेको हो । नम्बर प्लेट परिवर्तन गरेर उक्त मोटरसाइकल चलाइरहेका भारतको बिहार राज्य अररिया जिल्ला सोनापुर–९ बस्ने २२ वर्षीय मोहमद सहानुवाजलाई पक्राउ गरिएको डीएसपी मिश्रले बताए ।

Advertisement

प्रहरीका अनुसार को १९ प ५२०२ नम्बरको मोटरसाइकल २०८३ वैशाख ७ गते दिउँसो करिब १२ः३० बजेतिर हराएको भन्दै विराटनगर–१४ का रवीन्द्रकुमार यादवले निवेदन दिएका थिए । त्यसपछि जिल्ला प्रहरी कार्यालय मोरङ तथा मातहतका प्रहरी कार्यालयबाट खोजी अभियान सञ्चालन गरिएको थियो ।

खोजतलासकै क्रममा आइतबार दिउँसो करिब ३ बजेतिर विराटनगर–१७ रानी क्षेत्रमा नम्बर प्लेट परिवर्तन गरेर चलाइरहेको अवस्थामा उक्त मोटरसाइकल फेला परेको डीएसपी मिश्रको भनाइ छ । त्यसलगत्तै मोटरसाइकल चालक मोहमद सहानुवाजलाई नियन्त्रणमा लिएर अनुसन्धान एवं कारबाहीको दायरामा ल्याइएको उनले बताए ।

प्रहरीले चोरी भएको मोटरसाइकलको वास्तविक नम्बर लुकाउन अर्को नम्बर प्लेट प्रयोग गरिएको जनाएको छ । सक्कली नम्बर प्लेट हटाएर उक्त मोटरसाइकलमा बीआर ३८–१३०८ नम्बर राखिएको पाइएको छ ।

पक्राउ परेका युवकलाई मोटरसाइकलसहित जिल्ला प्रहरी कार्यालय मोरङ ल्याएर चोरी मुद्दामा अनुसन्धान अघि बढाइएको जानकारी डीएसपी मिश्रले दिए । उनका अनुसार प्रहरीबाट पहिचान नहोस् भनेर चोरीमा संलग्नले नम्बर प्लेट परिवर्तन गर्दै चोरीको मोटरसाइकल चलाउने गरेको पाइएको छ ।