महामारी नियन्त्रणका लागि स्वास्थ्यकर्मीलाई ‘रोग निगरानी’ सम्बन्धी प्रशिक्षण

विराटनगर । महामारीजन्य तथा संक्रामक रोगको प्रारम्भिक पहिचान र समुदाय स्तरमै नियन्त्रणका उपायलाई प्रभावकारी बनाउन विराटनगर महानगरपालिकाले स्वास्थ्यकर्मीका लागि दुई दिने विशेष अभिमुखीकरण कार्यक्रम सुरु गरेको छ ।

महानगरपालिकाको स्वास्थ्य महाशाखाद्वारा आयोजित ‘समुदायमा आधारित रोग निगरानी प्रणाली’ सम्बन्धी सो कार्यक्रममा १९ वटै वडाका स्वास्थ्यकर्मीहरूको सहभागिता रहेको छ । कार्यक्रममा स्वास्थ्यकर्मीहरूलाई रोगका लक्षण पहिचान, जोखिम मूल्यांकन, सूचना व्यवस्थापन तथा महामारी नियन्त्रणका व्यावहारिक सीप सिकाइने छ ।

Advertisement

कार्यक्रमको उद्घाटन गर्दै महानगरका प्रमुख प्रशासकीय अधिकृत विजयकुमार शर्माले महामारी नियन्त्रणका लागि समयमै सूचना प्राप्त हुनु सबैभन्दा महत्त्वपूर्ण हुने बताए । ‘समुदायमा देखिने असामान्य स्वास्थ्य अवस्थाबारे स्वास्थ्यकर्मीले तत्काल सूचना संकलन र सम्प्रेषण गर्नुपर्छ,’ शर्माले भने, ‘ढिलो सूचना प्रवाहले महामारी नियन्त्रणमा चुनौती थप्न सक्छ, त्यसैले यस प्रशिक्षणबाट प्राप्त ज्ञानलाई व्यवहारमा उतार्न जरुरी छ ।’

त्यस्तै, महानगरका प्रवक्ता एवं वडा नं. ५ का वडाध्यक्ष सन्तोष न्यौपानेले कोरोना महामारीको अनुभव सुनाउँदै समुदाय, स्वास्थ्यकर्मी र स्थानीय सरकारबीचको सहकार्यले मात्र ठुला मानवीय क्षति रोक्न सकिने उल्लेख गरे ।

महानगरको जनस्वास्थ्य अधिकृत रमेश कार्कीका अनुसार स्वास्थ्यकर्मीहरूलाई ‘सोरमास’ नामक डिजिटल सूचना प्रणाली सञ्चालनसम्बन्धी विशेष प्रशिक्षण दिइएको छ । यस प्रणालीमार्फत स्थानीय तहमा संकलित स्वास्थ्य विवरणहरू प्रदेश र संघीय निकायसम्म छिटो र व्यवस्थित रूपमा पुग्ने छन्, जसले गर्दा महामारी फैलिनुअघि नै आवश्यक रणनीति बनाउन सहज हुनेछ ।

स्वास्थ्य महाशाखा प्रमुख डा.दिलीपकुमार यादवले रोगको प्रारम्भिक संकेतलाई बेवास्ता नगर्न आग्रह गर्दै भने, ‘संक्रमण फैलिनुअघि नै नियन्त्रण गर्न रिपोर्टिङ प्रणालीलाई बलियो बनाउनु अहिलेको आवश्यकता हो ।’
जलवायु परिवर्तन र बढ्दो सहरीकरणका कारण संक्रामक रोगको जोखिम बढ्दै गएको सन्दर्भमा यो निगरानी प्रणालीलाई प्रभावकारी मानिएको छ ।

विराटनगर महानगरले आगामी दिनमा सबै वडामा डिजिटल रिपोर्टिङ र आपत्कालीन स्वास्थ्य प्रतिकार्य संयन्त्रलाई थप विस्तार गर्ने लक्ष्य राखेको छ । कार्यक्रममा कोशी प्रदेश स्वास्थ्य निर्देशनालयका निर्देशक सागर प्रसाईं, पीएचआरडीका जनस्वास्थ्य प्रशासक लगायतको उपस्थिति रहेको थियो ।