स्वीडेनमाथि नेदरल्यान्ड्स हाबी

अमेरिका । फिफा विश्वकपअन्तर्गत समूह ‘एफ’ को दोस्रो खेलमा नेदरल्यान्ड्सले स्वीडेनलाई ५–१ गोलअन्तरले पराजित गर्दै अन्तिम ३२ मा पुग्ने सम्भावना बलियो बनाएको छ ।

पहिलो खेलमा जापानसँग २–२ को बराबरीमा रोकिएको डच टोलीले दोस्रो खेलमा भने आक्रामक प्रदर्शन गर्दै प्रभावशाली जित निकालेको हो । रोनाल्ड कोम्यानको प्रशिक्षणमा रहेको नेदरल्यान्ड्सका लागि ब्रायन ब्रोबे र कोडी गाक्पोले समान दुई–दुई गोल गरे । वेस्ट ह्यामका क्रिसेन्सियो समरभिलले थप एक गोल गर्दा स्वीडेनका एन्थोनी एलाङ्गाले एक मात्र सान्त्वना गोल फर्काए ।

खेलको पाँचौं मिनेटमै नेदरल्यान्ड्सले अग्रता लिएको थियो । गोलरक्षक बार्ट भेर्ब्रुगेनको लामो पासलाई उत्कृष्ट रूपमा नियन्त्रण गरेका ब्रोबेले स्वीडेनको रक्षापंक्ति चिर्दै गोल गरे । १७औं मिनेटमा डेन्जेल डम्फ्रिसको लो–क्रसमा ब्रोबेले पुनः गोल गर्दै टोलीलाई २–० को अवस्थामा पुर्‍याए ।

पहिलो हाफको इन्जुरी समयमा स्वीडेनले गोल फर्काएको जस्तो देखिए पनि अफसाइडका कारण त्यो गोलले मान्यता पाएन । पहिलो हाफ नेदरल्यान्ड्सकै दुई गोलको अग्रतामा सकियो ।

दोस्रो हाफ सुरु भएको दुई मिनेटमै डच टोलीले अर्को गोल थप्यो । डम्फ्रिसकै आकर्षक क्रसमा लिभरपुलका फरवार्ड कोडी गाक्पोले हेडमार्फत गोल गर्दै स्कोर ३–० बनाए । ५४औं मिनेटमा गाक्पोले व्यक्तिगत दोस्रो गोल गरेपछि नेदरल्यान्ड्सले ४–० को अग्रता बनायो ।

यो गोलसँगै प्रतियोगितामा ३३ खेलमा कुल १०० गोल पूरा भएको छ । सन् १९५८ पछि विश्वकपमा यति कम खेलमा १०० गोलको आँकडा पार भएको यो पहिलो हो ।

५९औं मिनेटमा वैकल्पिक खेलाडी एन्थोनी एलाङ्गाले गोल गर्दै स्वीडेनलाई खेलमा फर्काउने प्रयास गरे पनि त्यो पर्याप्त हुन सकेन । खेलको अन्त्यतिर क्रिसेन्सियो समरभिलले अर्को गोल थप्दै नेदरल्यान्ड्सको शानदार जित सुनिश्चित गरे ।

लगातार आक्रामक खेल र अवसरको भरपूर सदुपयोग गरेर स्वीडेनमाथि हाबी भएको नेदरल्यान्ड्स चार अंकसहित समूह ‘एफ’ को शीर्ष स्थानमा उक्लिएको छ । जापानसँगको पहिलो खेलमा अंक बाँडेको डच टोली स्वीडेनविरुद्धको फराकिलो जितसँगै नकआउट चरणतर्फ अघि बढेको छ ।

उता, लगातार दबाबमा परेको स्वीडेन भने समूह चरणबाट अघि बढ्ने सम्भावना जीवित राख्न अन्तिम खेलमा जापानविरुद्ध जित निकाल्नुपर्ने दबाबमा पुगेको छ ।