धरान घर भएका दिनेश भट्टराई इटहरीबाट पक्राउ

विराटनगर । सुनसरीको धरान घर भएका एक जना इटहरीबाट पक्राउ परेका छन् । धरान उपमहानगरपालिका–११ का ४१ वर्षीय दिनेश भट्टराई पक्राउ परेका हुन् ।

प्रहरीका अनुसार भट्टराई इटहरी उपमहानगरपालिका–४ मा डेरा गरेर बस्दै आएको खुलेको छ । भट्टराईको इटहरीस्थित कोठामा लागुऔषधको कारोबार भइरहेको विशेष सूचनाका आधारमा कोशी प्रदेश प्रहरी कार्यालय विराटनगर र इलाका प्रहरी कार्यालय इटहरीको संयुक्त टोलीले बिहीबार दिउँसो ३ बजेतिर छापा हानेको थियो ।

छापा हान्ने क्रममा प्रहरीले भट्टराईको कोठा खानतलासी गर्दा ४.०२ ग्राम लागुऔषध खैरो हेरोइन (ब्राउन सुगर) र ११ हजार ९ सय रूपैयाँ नगद बरामद गरेको छ । लागुऔषध र रकमसहित उनलाई प्रहरीले पक्राउ गरेको छ । पक्राउ परेका भट्टराईविरुद्ध लागुऔषध ऐनअन्तर्गतको मुद्दा चलाउनका लागि इटहरी प्रहरीले थप अनुसन्धान गरिरहेको छ ।