फ्रान्स अन्तिम आठमा, सेमिफाइनलको प्रतिस्पर्धा मोरक्कोसँग

अमेरिका । कप्तान केलियन एम्बाप्पेको दोस्रो हाफको पेनाल्टी गोलको मद्दतमा साविक उपविजेता फ्रान्स फिफा विश्वकप २०२६ को क्वार्टरफाइनलमा प्रवेश गरेको छ ।

अमेरिकाको फिलाडेल्फियामा सम्पन्न राउन्ड अफ १६ को प्रतिस्पर्धामा फ्रान्सले संघर्षशील पाराग्वेमाथि १–० को कठिन जित निकाल्दै अन्तिम आठमा स्थान सुरक्षित गरेको हो । खेलभर अनुशासित र रणनीतिक प्रदर्शन गरेको पाराग्वेले फ्रान्सलाई सहज रूपमा आक्रामक खेल देखाउने अवसर दिएन ।

अत्यधिक गर्मीबीच दुवै टोलीले कडा प्रतिस्पर्धा गरे पनि दोस्रो हाफमा भएको एउटा गल्ती पाराग्वेलाई महँगो सावित भयो । खेलको ७०औँ मिनेटमा डिजायर डुएलाई पेनाल्टी क्षेत्रभित्र लडाइएपछि फ्रान्सले पेनाल्टीको अवसर पाएको थियो ।

त्यसको जिम्मेवारी लिएका एम्बाप्पेले कुनै गल्ती नगरी बललाई जाली चुमाउँदै फ्रान्सलाई अग्रता दिलाए । अन्तिम समयसम्म उक्त गोल नै निर्णायक बन्यो ।

एम्बाप्पेको जारी विश्वकपमा यो सातौँ गोल हो । उनी अर्जेन्टिनाका कप्तान लियोनल मेसीसँग संयुक्त रूपमा प्रतियोगिताका सर्वाधिक गोलकर्ता बनेका छन् । साथै, विश्वकपमा मेसीको सर्वकालीन २० गोलको कीर्तिमानभन्दा एम्बाप्पे अब एक गोलले मात्र पछाडि रहेका छन् ।

खेलमा फ्रान्सले बल नियन्त्रण र आक्रमण दुवैमा स्पष्ट दबाब बनाएको थियो । फ्रान्सले ५९ प्रतिशत समय बल आफ्नो नियन्त्रणमा राख्दै १५ पटक प्रहार गर्दा पाराग्वेले पाँचवटा मात्र प्रहार गर्न सक्यो । त्यसमध्ये एउटा मात्र प्रहार पोस्टको दिशामा थियो ।

प्रतिस्पर्धाका क्रममा दुवै टोलीका खेलाडीबीच केही समय धकेलाधकेल र तनावपूर्ण अवस्था पनि देखिएको थियो । त्यसका बाबजुद फ्रान्सले संयम कायम राख्दै न्यून अन्तरको जित सुरक्षित गर्न सफल भयो ।

विश्वकपमा १८औँ सहभागिता जनाइरहेको फ्रान्स दशौँ पटक क्वार्टरफाइनल पुग्न सफल भएको हो । अब सेमिफाइनल प्रवेशका लागि उसले मोरक्कोसँग प्रतिस्पर्धा गर्नेछ ।

यी दुई टोली सन् २०२२ को विश्वकपको सेमिफाइनलमा पनि आमनेसामने भएका थिए । जहाँ फ्रान्स विजयी हुँदै फाइनल पुगेको थियो । यसपटक मोरक्को पुरानो हारको बदला लिने लक्ष्यमा रहनेछ भने फ्रान्स अर्को पटक उपाधि यात्रालाई निरन्तरता दिने योजनामा हुनेछ ।