गोल्डेन बुटको होड : मेसी शीर्ष स्थानमा

अमेरिका । विश्वका चर्चित फुटबलर एवं अर्जेन्टिनाका कप्तान लियोनल मेसी फिफा विश्वकपको गोल्डेन बुट प्राप्त गर्ने होडको शीर्ष स्थानमा उक्लिएका छन् ।

बिहीबार बिहान अमेरिकाको एटलान्टामा सम्पन्न दोस्रो सेमिफाइनलमा इंग्ल्याण्डविरुद्ध अर्जेन्टिनाले २–१ को पुनरागमन जित निकाल्दा ३९ वर्षीय मेसीले दुवै गोलमा उत्कृष्ट असिस्ट गर्दै आफ्नो दाबेदारी थप बलियो बनाएका हुन् । यस खेलमा मेसीले गोल गर्न नसके पनि दुई असिस्ट थपेपछि उनी फ्रान्सका कप्तान किलियन एमबाप्पेलाई पछि पार्दै गोल्डेन बुटको अग्रस्थानमा पुगेका छन् ।

Advertisement

हालसम्म दुवैले ७–७ खेलमा समान ८–८ गोल गरेका छन् । तर, फिफाको नियमअनुसार गोल संख्या बराबर भएमा असिस्टको आधारमा वरियताको निर्धारण गरिन्छ । मेसीको नाममा ४ असिस्ट पुगेको छ भने एमबाप्पेसँग ३ असिस्ट मात्रै छन् । यही कारण मेसी हाल गोल्डेन बुट दौडमा पहिलो स्थानमा रहेका हुन् ।

फ्रान्स सेमिफाइनलमा स्पेनसँग पराजित भइसकेकाले एमबाप्पेका लागि अब इंग्ल्याण्डविरुद्धको तेस्रो स्थानको खेल मात्र बाँकी छ । त्यस खेलमा उनले गोल वा असिस्ट थप्न सकेमा मात्रै मेसीलाई चुनौती दिन सक्नेछन् । यता इंग्ल्याण्डमाथि जित निकाल्दै अर्जेन्टिना फाइनलमा पुगेकाले मेसीसँग गोल र असिस्ट दुवै बढाउने अर्को अवसर अझै बाँकी छ ।

गोल्डेन बुटको प्रतिस्पर्धामा रहेका अन्य प्रमुख खेलाडी भने बाहिरिइसकेका छन् । ७ गोल गरेका नर्वेका अर्लिङ हालान्ड यसअघि नै प्रतियोगिताबाट बाहिरिएका थिए । ६–६ गोल गरेका इंग्ल्याण्डका ह्यारी केन र जुड बेलिङ्घमको यात्रा सेमिफाइनलमै टुंगिएको छ ।

फ्रान्सका उसमान डेम्बेले पनि ५ गोलसहित प्रतियोगिताबाट बाहिरिएका छन् । फाइनलमा पुगेको स्पेनका मिकेल ओयार्जुबाल ५ गोलसहित गोल्डेन बुटको दौडमा सातौँ स्थानमा रहेका छन् ।