सरकार र आन्दोलनरत चिकित्सकबीच ५ बुँदे सहमति, आन्दोलनका कार्यक्रम फिर्ता

Share this
759shares
मुलुकी खबर
मुलुकी खबर
clock२०८३ साउन १३, बुधबार १८:५४

काठमाडौं। सरकार र आन्दोलनरत चिकित्सकहरूबीच ५ बुँदे सहमति भएको छ। बुधबार सहमति भएसँगै नेपाल चिकित्सक संघले आफ्ना सम्पूर्ण आन्दोलनका कार्यक्रम फिर्ता लिएर नियमित स्वास्थ्य सेवा सञ्चालन गर्ने भएको छ।

स्वास्थ्य तथा खाद्य स्वच्छता मन्त्रालयमा कानुन, न्याय तथा संसदीय मामिला मन्त्रालय, गृह मन्त्रालय, उद्योग, वाणिज्य तथा आपूर्ति मन्त्रालय र नेपाल चिकित्सक संघका पदाधिकारीहरूबीच भएको छलफलपछि सहमतिपत्रमा हस्ताक्षर भएको हो।

सहमतिअनुसार सरकारले स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन, २०६६ लाई प्रभावकारी रूपमा कार्यान्वयन गर्ने प्रतिबद्धता जनाएको छ। ऐनमा रहेका व्यवस्थालाई कार्यान्वयन गर्न आवश्यक निर्देशिका छिट्टै तयार गर्ने, स्वास्थ्य संस्थामा हुने तोडफोड तथा स्वास्थ्यकर्मीमाथि हुने आक्रमणका घटनामा कानुनी कारबाही प्रभावकारी बनाउने र सम्बन्धित मन्त्रालयहरूबीच आवश्यक समन्वय गर्ने सहमति भएको छ।

यस्तै स्वास्थ्य संस्थाको सुरक्षा सुनिश्चित गर्न कार्ययोजना तयार गरी नेपाल चिकित्सक संघको सहकार्यमा एक कार्यदल गठन गर्ने र कार्यान्वयनको प्रगति नियमित रूपमा समीक्षा गर्ने पनि सहमतिमा उल्लेख छ। सहमति भएसँगै चिकित्सकहरूले जारी राखेको आन्दोलन तत्कालका लागि स्थगित गरी सेवामा फर्किएका छन्।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.