२०८३ श्रावण १७, आइतबार १७:२१
काठमाडौँ । युट्युब च्यानलमार्फत भ्रामक सूचना सम्प्रेषण गरी समाजमा अफवाह र धार्मिक–जातीय द्वेष फैलाएको आरोपमा प्रहरीले एक जनालाई पक्राउ गरेको छ । नेपाल प्रहरीको साइबर ब्युरोले अर्घाखाँचीको सन्धिखर्क नगरपालिका–९ घर भई हाल बुटवल बस्ने ३९ वर्षीय जनक भुसाललाई नियन्त्रणमा लिएको हो ।
भुसालले ‘नेपाली खबर टिभी’ नामक युट्युब च्यानलमार्फत सामाजिक सञ्जालमा फलोअर्स बढाउने र आर्थिक उपार्जन गर्ने नियतले राज्यको विद्यमान परिवेशलाई प्रत्यक्ष असर पार्ने भ्रामक सामग्रीहरू प्रसारण गर्ने गरेको ब्युरोले जनाएको छ ।
प्रहरीका अनुसार युट्युबमा समाजमा भ्रामक अफवाह फैलाउने, घृणा तथा द्वेष उत्पन्न गराउने, जातजाति र धार्मिक सम्प्रदायबीचको सुसम्बन्धमा खलल पुर्याउने खालका सामग्री सम्प्रेषण गरिएका थिए ।
भुसाललाई विद्युतीय कारोबार ऐन, २०६३ अनुसार कारबाही अघि बढाइएको प्रहरीले जनाएको छ । जिल्ला अदालत काठमाडौँबाट सात दिनको म्याद थप अनुमति लिई उनीमाथि साइबर ब्युरोले आवश्यक अनुसन्धान सुरु गरेको छ ।
इमेल: [email protected]
ठेगाना: विराटनगर–२
मोबाइल नं. : ९८१९३३६४१६, ९८५२०५१७६५, ९८०७०१४०८१
कम्पनी रजिष्ट्रार दर्ता नं. : ३५०५५२–८१/८२
सूचना विभाग दर्ता नं. : ४६८३–२०८१/२०८२
सम्पादक : किशोर बुढाथोकी