जयपृथ्वीबहादुर सिंह पुरस्कारबाट न्यौपाने र पोखरेल सम्मानित

काठमाडौं । द राइजिङ स्टार स्कुल, मण्डिखाटारको आयोजनामा मानवतावादी चिन्तक, स्रष्टा तथा पत्रकार जयपृथ्वीबहादुर सिंहको स्मृतिमा स्थापित विशेष पुरस्कार प्रदान गर्दै साहित्यिक तथा सम्मान कार्यक्रम सम्पन्न भएको छ।

विद्यालयका प्राचार्य कृष्णकुमार बोहोराको सभापतित्व तथा नेपाल प्रज्ञा–प्रतिष्ठानका प्राज्ञ डा. विष्णुविभु घिमिरेको प्रमुख आतिथ्यमा आयोजित कार्यक्रममा शिक्षा तथा साहित्य क्षेत्रका विशिष्ट व्यक्तित्व डा. छायादत्त न्यौपाने र विवश पोखरेललाई सम्मान गरिएको हो।

जयपृथ्वीबहादुर सिंहको मानवतावादी विचार, दर्शन र आदर्शलाई समाजमा उजागर गर्ने उद्देश्यले स्थापित उक्त पुरस्कारबाट सम्मानित व्यक्तित्वहरूको प्राज्ञिक तथा साहित्यिक योगदानको कदर गरिएको विद्यालयले जनाएको छ।

कार्यक्रममा वक्ताहरूले सिंहको मानवतावादी दर्शन तथा पत्रकारिता क्षेत्रमा उनले पुर्‍याएको योगदानको चर्चा गर्दै डा. न्यौपाने र पोखरेलको साहित्यिक एवं बौद्धिक साधनाको प्रशंसा गरेका थिए।

विद्यार्थीमा नैतिक शिक्षा, मानवीय मूल्य–मान्यता र साहित्यिक स्रष्टाप्रति सम्मानभाव विकास गर्ने उद्देश्यले विद्यालयले यस्ता साहित्यिक तथा सांस्कृतिक कार्यक्रम आयोजना गर्दै आएको जनाएको छ।