
झापा । माघे सङ्क्रान्तिको अवसर पारेर झापाको मेचीनगर–४ बाहुनडाँगीमा आगामी पुस ३० र माघ १ गते दुई दिने ‘अन्तर्राष्ट्रिय तरुल महोत्सव’ आयोजना हुने भएको छ। हात्ती प्रभावित क्षेत्रका रूपमा परिचित बाहुनडाँगीमा पर्यटकीय चहलपहल बढाउने र रैथाने खानेकुराको संरक्षण गर्ने उद्देश्यले यो महोत्सव आयोजना गर्न लागिएको हो।
महोत्सवमा नेपालसहित छिमेकी मुलुक भारत र भुटानमा उत्पादन हुने विभिन्न जातका तरुल र १८ प्रकारका रैथाने खानेकुराहरूको विशेष प्रदर्शनी गरिने आयोजक समितिका अध्यक्ष एवं वडाध्यक्ष अर्जुन कार्कीले जानकारी दिनुभयो। सरकारी र गैरसरकारी गरी १४ वटा संस्थाहरूको सहकार्यमा हुन लागेको यो चौथो संस्करणको महोत्सव हो। कोशी प्रदेश सरकार, पर्यटन कार्यालय काँकडभिट्टा र युएनडिपी, इसिमोड, डब्ल्युडब्ल्युएफ जस्ता अन्तर्राष्ट्रिय संस्थाहरूले यसमा सहयोग गरेका छन्।
परम्परागत र पोषिलो खानपानको महत्त्व दर्शाउन आयोजना गरिएको यस महोत्सवलाई करिब ५० हजार दर्शकले अवलोकन गर्ने अनुमान गरिएको छ। महोत्सवमा स्थानीय र रैथाने स्वादका साथै चर्चित लोककलाकार डेजी बराइली र कमलिकान्त भेटवालको साङ्गीतिक प्रस्तुतिसमेत रहने आयोजकले जनाएको छ।

























