
काठमाडौँ । अघिल्लो दिन हालसम्मकै उच्च मूल्यको नयाँ रेकर्ड कायम गरेको सुन र चाँदीको भाउमा बिहीबार गिरावट आएको छ। नेपाल सुनचाँदी व्यवसायी महासंघका अनुसार आज सुनको मूल्य प्रतितोला १ हजार ५ सय रुपैयाँले घटेको छ।
महासंघले बिहीबारका लागि सुनको मूल्य प्रतितोला २ लाख ७६ हजार ५ सय रुपैयाँ तोकेको छ। बुधबार प्रतितोला २ लाख ७८ हजार रुपैयाँको उच्च बिन्दुमा पुगेर सुनले नयाँ रेकर्ड बनाएको थियो।
सुनसँगै चाँदीको मूल्यमा पनि ठूलो गिरावट देखिएको छ। चाँदी तोलामा १७० रुपैयाँले घटेर आज प्रतितोला ५ हजार ४८५ रुपैयाँ कायम भएको छ। अघिल्लो दिन चाँदी प्रतितोला ५ हजार ६५५ रुपैयाँको ऐतिहासिक उच्च मूल्यमा कारोबार भएको थियो।
अन्तर्राष्ट्रिय बजारमा हुने उतारचढावका कारण नेपाली बजारमा पनि सुनचाँदीको मूल्यमा प्रभाव परेको व्यवसायीहरूले बताएका छन्।

























