
काठमाडौं। नेपाल स्टक एक्सचेन्ज (नेप्से) परिसूचक बुधबार ९.४३ अंकले घटेको छ। मंगलबार ४२ अंकभन्दा बढीले बढेर पाँच महिनायताकै उच्च विन्दुमा पुगेको बजारमा आज सामान्य ‘करेक्सन’ देखिएको हो। यस गिरावटसँगै परिसूचक २७०५.३८ विन्दुमा कायम भएको छ।
बजार ओरालो लाग्दा कारोबार रकममा पनि केही संकुचन आएको छ। मंगलबार ११ अर्ब ८५ करोड रुपैयाँको सेयर किनबेच भएकोमा बुधबार ८ अर्ब ९२ करोड रुपैयाँमा सीमित भयो। आज दिनभरिमा कुल २ करोड १६ लाख कित्ता सेयर खरिदबिक्री भएका छन्।
मूल्य वृद्धिका आधारमा आज कालिका पावर कम्पनीका लगानीकर्ताले सबैभन्दा धेरै ९.८४ प्रतिशत नाफा कमाए भने नारायणी विकास बैंकको मूल्य ९.१६ प्रतिशतले बढ्यो। गिरावटतर्फ भने गुराँस लघुवित्तको मूल्य ५.८९ प्रतिशत र मञ्जुश्री फाइनान्सको मूल्य ४.६४ प्रतिशतले घट्यो। आज कुल ८२ कम्पनीको मूल्य बढ्दा १७४ कम्पनीको सेयर मूल्यमा गिरावट आयो भने तीन कम्पनीको मूल्य स्थिर रह्यो।
कारोबार रकमका आधारमा आँखुखोला जलविद्युत् कम्पनी ४३ करोड रुपैयाँसहित शीर्ष स्थानमा रह्यो। यस्तै एनआरएन इन्फ्रास्ट्रक्चरको ३५ करोड, हिमालयन रिइन्स्योरेन्सको ३३ करोड, युनाइटेड मोदी हाइड्रोपावरको २८ करोड ९७ लाख र राधी विद्युत् कम्पनीको २८ करोड २५ लाख रुपैयाँ बराबरको सेयर कारोबार भएको छ।

























