
काठमाडौँ । नेपाली बजारमा सुन र चाँदीको मूल्य बढेर पुनः ऐतिहासिक उचाइमा पुगेको छ। मंगलबार सुनको मूल्य तोलामा ३ सय रुपैयाँले बढेर अहिलेसम्मकै महँगो भएको हो।
नेपाल सुनचाँदी व्यवसायी महासङ्घका अनुसार आज छापावाल सुन प्रतितोला ३ लाख ९ हजार ३ सय रुपैयाँमा कारोबार भइरहेको छ। हिजो सोमबार सुन प्रतितोला ३ लाख ९ हजार रुपैयाँमा कारोबार भएको थियो। आज कायम भएको यो मूल्य नेपाली सुन बजारको इतिहासमा हालसम्मकै उच्च हो।
सुनको मूल्य मात्र होइन, आज चाँदीको मूल्यले पनि नयाँ कीर्तिमान कायम गरेको छ। चाँदी तोलामा १ सय ५ रुपैयाँले बढेर प्रतितोला ६ हजार ८ सय ७० रुपैयाँ पुगेको छ। यसअघि सोमबार चाँदी प्रतितोला ६ हजार ७ सय ६५ रुपैयाँमा कारोबार भएको थियो।
दश ग्राम सुनको मूल्य २ लाख ६५ हजार १ सय ७५ रुपैयाँ र १० ग्राम चाँदीको मूल्य ५ हजार ८ सय ९० रुपैयाँ तोकिएको छ। अन्तर्राष्ट्रिय बजारमा पनि बहुमूल्य धातुको मूल्यमा वृद्धि भइरहेकाले त्यसको प्रत्यक्ष प्रभाव नेपाली बजारमा परेको व्यवसायीहरू बताउँछन्।

























