
काठमाडौँ । साताको पहिलो कारोबार दिन आइतबार धितोपत्र बजारमा ओरालो यात्रा देखिएको छ। उतारचढावका बिच नेप्से सूचक १९.८५ अङ्कले घटेर २६९४.२० विन्दुमा ओर्लिएको छ। बजार घटे पनि कारोबार रकम भने ९ अर्ब १० करोड ९४ लाख रुपैयाँ माथि पुग्नुलाई उत्साहजनक मानिएको छ। दिनभरिमा ३२९ कम्पनीका २ करोड २० लाख ६० हजार कित्ता सेयर किनबेच भएका छन्।
आजको बजारमा ५० वटा कम्पनीको सेयर मूल्य बढेको छ भने २०१ वटा कम्पनीको मूल्यमा गिरावट आएको छ। बाँकी ९ कम्पनीको मूल्य भने स्थिर रह्यो। ट्रेडिङ बाहेक सबै समूहमा गिरावट आउँदा होटल समूह १.७५ प्रतिशत र जलविद्युत समूह १.३६ प्रतिशतले घटेका छन्।
नाफा कमाउने कम्पनीहरूमा मिथिला लघुवित्त वित्तीय संस्था अग्रस्थानमा रह्यो जसको सेयर मूल्य ९.७० प्रतिशतले बढेको छ। त्यस्तै क्रेस्ट माइक्रो लाइफको मूल्य ८.१९ प्रतिशत र एनआईबीएल ग्रोथ फण्डको मूल्य ६.५१ प्रतिशतले वृद्धि भयो। अर्कोतर्फ कर्पोरेट डेभलपमेन्ट बैंकको मूल्य १० प्रतिशतले घट्दै नकारात्मक सर्किट लाग्यो भने रावा इनर्जीको मूल्य ९.३४ प्रतिशतले ओरालो लाग्यो।
कारोबार रकमका आधारमा आज आँखुखोला जलविद्युत कम्पनी लिमिटेड अग्रस्थानमा रह्यो। यस कम्पनीको ५५ करोड ५२ लाख रुपैयाँ बराबरको कारोबार भएको छ। त्यस्तै एसवाई प्यानलको ५३ करोड ६४ लाख र राधी विद्युत कम्पनीको ३८ करोड ९८ लाख रुपैयाँको सेयर किनबेच भएको छ।

























