महँगी २.४२ प्रतिशतमा झर्‍यो, खाद्यवस्तुको मूल्य समग्रमा घट्यो

Share this
764shares
मुलुकी खबर
मुलुकी खबर
clock२०८२ माघ १९, सोमबार १८:४७

काठमाडौं । नेपालमा उपभोक्ता महँगी उल्लेख्य रूपमा घटेको छ । नेपाल राष्ट्र बैंकले सार्वजनिक गरेको आर्थिक वर्ष २०८२–०८३ को पहिलो ६ महिनाको तथ्यांकअनुसार पुस महिनामा वार्षिक बिन्दुगत उपभोक्ता मुद्रास्फीति २.४२ प्रतिशतमा खुम्चिएको हो।

अघिल्लो वर्ष सोही महिनामा यस्तो मुद्रास्फीति ५.४१ प्रतिशत रहेको थियो । १ वर्षको अवधिमा महँगी दर आधाभन्दा बढीले घटेको देखिन्छ । राष्ट्र बैंकका अनुसार खाद्य तथा पेय पदार्थ समूहको मुद्रास्फीति ०.०९ प्रतिशतले ऋणात्मक भएको छ ।

यसको अर्थ गत वर्षको तुलनामा समग्र खाद्यवस्तुको मूल्यमा केही गिरावट आएको हो । खाद्य समूहअन्तर्गत दाल तथा गेडागुडीको मूल्य ५.५२ प्रतिशत, मरमसला ३.९२ प्रतिशत र अन्य खाद्य तथा खाद्यजन्य पदार्थको मूल्य ३.७० प्रतिशतले घटेको छ । तर, यसै समूहभित्र फलफूलको मूल्य ५.२० प्रतिशत, घिउ तथा तेलको ४.९६ प्रतिशत र गैरमदिराजन्य पेय पदार्थको मूल्य ३.०४ प्रतिशतले बढेको देखिन्छ ।

खाद्यवस्तुको तुलनामा गैरखाद्य तथा सेवा समूहमा भने महँगी उच्च छ । पुसमा यस समूहको मुद्रास्फीति ३.८१ प्रतिशत पुगेको छ । गैरखाद्य समूहअन्तर्गत विविध वस्तु तथा सेवाको मूल्यमा २१.७५ प्रतिशतको उल्लेख्य वृद्धि देखिएको छ । यस्तै शिक्षा क्षेत्रको लागत ७.५६ प्रतिशत, कपडा तथा जुत्ताचप्पलको ५.२९ प्रतिशत र सुर्तीजन्य पदार्थको मूल्य ४.१५ प्रतिशतले बढेको राष्ट्र बैंकको तथ्यांकले देखाउँछ ।

क्षेत्रगत रूपमा हेर्दा सहरी क्षेत्रमा महँगी दर ग्रामीण क्षेत्रको तुलनामा केही बढी देखिएको छ । ग्रामीण क्षेत्रमा मुद्रास्फीति १.९९ प्रतिशत रहँदा सहरी क्षेत्रमा २.५७ प्रतिशत कायम भएको छ । काठमाडौं उपत्यकामा उपभोक्ता महँगी दर २.४८ प्रतिशत रहेको छ ।

प्रदेशगत विवरणअनुसार मधेश प्रदेशमा सबैभन्दा बढी ३.३७ प्रतिशत मुद्रास्फीति देखिएको छ भने कर्णाली प्रदेशमा सबैभन्दा कम १.०८ प्रतिशत मात्रै छ । अन्य प्रदेशहरूमा कोशी प्रदेशमा ३.२५ प्रतिशत, बागमतीमा २.१० प्रतिशत, लुम्बिनीमा २.६२ प्रतिशत, गण्डकीमा १.७६ प्रतिशत र सुदूरपश्चिममा १.२७ प्रतिशत मुद्रास्फीति कायम भएको छ ।

उपभोक्ता महँगी घटेको भए पनि थोक महँगी भने बढेको छ । २०८२ पुसमा वार्षिक बिन्दुगत थोक मुद्रास्फीति ५.१७ प्रतिशत पुगेको छ । अघिल्लो वर्ष सोही महिनामा थोक मुद्रास्फीति ४.०१ प्रतिशत मात्रै थियो । थोक मूल्य सूचकअन्तर्गत निर्माण सामग्रीको मूल्य ३.४८ प्रतिशतले बढेको देखिन्छ ।

समग्रमा चालु आर्थिक वर्ष २०८२–०८३ को पहिलो ६ महिनामा औसत मुद्रास्फीति १.७० प्रतिशतमा सीमित भएको छ । अघिल्लो वर्ष यही अवधिमा औसत मुद्रास्फीति ४.९७ प्रतिशत रहेको थियो । राष्ट्र बैंकको तथ्यांकले चालु आवमा मूल्यवृद्धि दर उल्लेख्य रूपमा नियन्त्रणमा आएको संकेत गरेको छ ।

तपाइको प्रतिक्रिया
शीर्ष नेताको सम्बोधन, रित्तो दर्शक दीर्घा: मोरङमा कांग्रेस इतर पक्षको अधिवेशन
बहिरा फुटबल टोली दक्षिण कोरिया जाने
मत्स्यपोखरीमा चार दिन पर्यटन, संस्कृति र साहित्यको उत्सव
राप्रपामा अध्यक्षका लागि आधा दर्जन नेताको दौडधुप, लिङ्देनलाई चुनौती
लुम्बिनीले टस जितेर बलिङ रोज्दा सुदूरपश्चिम पहिले ब्याटिङ गर्दै
विराटनगरमा कर दिवस मनाइयो, करदातामैत्री प्रणालीमा जोड
प्रहरीको नाममा भ्रामक सूचना फैलाउने दुई जना नियन्त्रणमा पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
© 2024 Muluki Khabar. All Rights Reserved. Design & Develop By: Indesign Media Pvt. Ltd.