
काठमाडौँ। साताको अन्तिम कारोबार दिन बिहीबार सेयर बजार परिसूचक (नेप्से) मा सामान्य वृद्धि देखिएको छ । लगातार चार दिनको गिरावटपछि आज नेप्से ८.९७ अङ्कले बढेर २६७१.०७ विन्दुमा पुगेर बन्द भएको हो ।
बजारमा आज कारोबार रकम भने निकै उत्साहजनक रहेको छ । दिनभरिमा ३३७ कम्पनीका २ करोड ७७ लाख कित्ता सेयर किनबेच हुँदा कुल ११ अर्ब १० करोड रुपैयाँ बराबरको कारोबार भएको छ । बजारका १३९ कम्पनीको सेयर मूल्य बढ्दा ११५ कम्पनीको घटेको छ भने ६ कम्पनीको मूल्य स्थिर रहेको छ ।
समूहगत आधारमा आज ८ वटा उपसमूहमा हरियाली छाएको छ भने ५ वटामा गिरावट देखिएको छ । विकास बैङ्क समूहमा सर्वाधिक १.१८ प्रतिशतको वृद्धि हुँदा होटल तथा पर्यटन समूहमा भने सबैभन्दा धेरै १.६५ प्रतिशतको गिरावट आएको छ ।
आजको कारोबारमा दुई वटा जलविद्युत कम्पनीको सेयर मूल्यमा सकारात्मक सर्किट लागेको छ । मध्य भोटेकोशी जलविद्युत कम्पनीको मूल्य ९.९९ प्रतिशत र रसुवागढी हाइड्रोपावरको मूल्य ९.८८ प्रतिशतले बढेको हो । यसैगरी खानीदोला हाइड्रोपावर, श्रीनगर एग्रोटेक र साञ्जेन जलविद्युत धेरै कमाउने शीर्ष पाँच कम्पनीभित्र परेका छन् । कालिञ्चोक दर्शनका लगानीकर्ताले भने आज सबैभन्दा धेरै ७.५९ प्रतिशत गुमाएका छन् ।
कारोबार रकमका आधारमा आज ङादी ग्रुप पावर लिमिटेड ७० करोड ५३ लाख रुपैयाँसहित अग्रस्थानमा रह्यो । त्यस्तै, एसवाई प्यानल, रिडी पावर कम्पनी, आँखुखोला जलविद्युत र तेह्रथुम पावर कम्पनी पनि उच्च कारोबार हुने कम्पनीको सूचीमा परेका छन् ।

























