
काठमाडौँ । नेपाल हक्की संघले आगामी फागुन ४ गतेदेखि काठमाडौँमा राष्ट्रिय महिला तथा पुरुष हक्की प्रतियोगिता आयोजना गर्ने भएको छ। संघले शुक्रबार राजधानीमा पत्रकार सम्मेलन गर्दै फागुन ४ देखि ११ गतेसम्म दशरथ रंगशालामा प्रतियोगिता सञ्चालन गर्ने जानकारी दिएको हो।
यस प्रतियोगितामा पुरुषतर्फ ६ र महिलातर्फ ५ टिमले उपाधिका लागि प्रतिस्पर्धा गर्नेछन्। पुरुषतर्फ मधेस, गण्डकी, कोशी, बागमती, सुदूरपश्चिम प्रदेश र नेपाल पुलिस क्लब सहभागी हुनेछन्। त्यस्तै महिलातर्फ कोशी, गण्डकी, मधेस, सुदूरपश्चिम र बागमती प्रदेशका टोलीहरू मैदान उत्रनेछन्।
प्रतियोगितामा पुरुष र महिला दुवैतर्फका विजेता टोलीले ७५ हजार, उपविजेताले ५० हजार र तेस्रो स्थान हासिल गर्नेले २५ हजार रुपैयाँ नगद पुरस्कार पाउनेछन्। व्यक्तिगत विधामा उत्कृष्ट हुने खेलाडीलाई ५ हजार र हरेक खेलको ‘प्लेयर अफ द म्याच’ लाई २ हजार रुपैयाँ नगद प्रदान गरिने संघले जनाएको छ।
करिब ४० लाख रुपैयाँ खर्च हुने अनुमान गरिएको यस प्रतियोगिताले हक्की खेलप्रति नयाँ पुस्ताको आकर्षण बढाउने विश्वास लिइएको छ।

























