
भोजपुर । भोजपुरमा राष्ट्रियस्तरको रंगशाला निर्माण भएपछि जिल्लामा खेल गतिविधि उल्लेखनीय रूपमा बढेको छ ।
भोजपुर नगरपालिका–७ कोदारमा निर्माण गरिएको रंगशालाले स्थानीय खेलकुदको स्वरूपलाई नै नयाँ उचाइमा पुर्याएको हो । कोशी प्रदेश सरकारले १४ करोड ५ लाखको लागतमा ५ हजार दर्शक क्षमता भएको रंगशाला निर्माण गरेको हो ।
करिब ७ हजार वर्गमिटरमा फैलिएको संरचना छ । २५ रोपनी जग्गामा ७ वटा प्यारापिट तयार पारिएका छन् । यसले राष्ट्रिय तथा प्रदेशस्तरीय प्रतियोगिता सहज रूपमा आयोजना गर्न सम्भव बनाएको छ ।
रंगशालाको योजना विसं २०६४ मा तत्कालीन जिल्ला विकास समितिले ५५ लाख रूपैयाँमा जिल्ला खेलकुद परिषद्मार्फत जग्गा खरिद गर्दै सुरु गरेको थियो । प्रारम्भिक बजेट विनियोजन भए पनि स्रोत अभावका कारण योजना केही वर्ष रोकिन पुग्यो ।
रंगशाला निर्माणपछि जिल्लामा खेलसँग सम्बन्धित गतिविधि वृद्धि भएको छ । साथै, स्थानीय आर्थिक गतिविधिमा पनि सकारात्मक प्रभाव परेको छ । नियमित प्रशिक्षण र प्रतियोगिता सञ्चालन गर्न पूर्वाधार अभावले बाधा पुर्याउँथ्यो । तर, अहिले युवा खेलाडीहरूलाई सहज वातावरण उपलब्ध भएको छ ।
भोजपुरकी अल्ट्रा धाविका मीरा राईले अन्तर्राष्ट्रियस्तरमा सहभागिता जनाउँदै जिल्लाको नाम उच्च बनाएकी छन् । साथै, ब्याडमिन्टनमा नङशलादेवी तामाङ, रत्नजित तामाङ, सरादेवी तामाङ, विकास श्रेष्ठ, विवेक श्रेष्ठ, नवीन श्रेष्ठ र भलिबलमा जोसन श्रेष्ठ र दुर्जकुमार राई (सशस्त्र प्रहरीका पूर्वआईजीपी)लगायतका खेलाडीले राष्ट्रिय तथा अन्तर्राष्ट्रिय प्रतियोगितामा जिल्लाको प्रतिनिधित्व गरिसकेका छन् ।
रंगशाला निर्माणले युवा पुस्तालाई खेलमा सक्रिय बनाउने मात्र नभई खेलसँग सम्बन्धित पूर्वाधार र व्यवस्थापनमा पनि नयाँ उर्जा थपेको छ । रंगशालाले भोजपुरमा खेलकुदको भविष्य उज्जवल बनाएको छ ।

























