
विराटनगर । विराटनगर महानगरपालिका– ७ मा रहेको ट्रान्सपोर्टबाट प्रहरीले बिल बिजक नभएको ठूलो परिमाणको लत्ताकपडा बरामद गरेको छ ।
जिल्ला प्रहरी कार्यालय मोरङका अनुसार सात घुम्तीमा रहेको जेबी ट्रान्सपोर्टमा बिल बिजकमा कम मूल्याङ्कन गरिएको र भीसीटीएस बिलसमेत नभएको लत्ताकपडा राखिएको सूचनाका आधारमा पुगेको प्रहरीले सेतो प्लास्टिकको बोरामा प्याक गरी राखिएको २० वटा पोका (बाेरा) लत्ताकपडा बरामद गरेको हो ।
बरामद गरिएका ती सामानहरूको बजार मूल्य करिब ७ लाख ३० हजार रुपैयाँ रहेको जिल्ला प्रहरी कार्यालय मोरङका सूचना अधिकारी प्रहरी नायब उपरीक्षक हरिनन्दन चौधरीले जानकारी दिए । बिल बिजक नभएपछि प्रहरीले बरामद गरिएका सामान कानुनी कारबाहीका लागि राजस्व अनुसन्धान कार्यालय इटहरी, सुनसरीमा बुझाएको छ ।

























